Ամերիկյան Time ամսագիրը ընտրել է «Բոլոր ժամանակների ամենաազդեցիկ 100 լուսանկարները»: Մեդիամաքսը պարբերաբար իր ընթերցողներին կներկայացնի Time-ի պատմությունները այդ լուսանկարների ստեղծման մասին:

Հարի Բենսոն` «Բարձերով ծեծկռտուքը»

Փարիզ, 1964 թվական

Լուսանկարիչ Հարի Բենսոնը երբեւէ չէր երազել The Beatles խմբի հետ հանդիպելու մասին: Գլազգոյում ծնված լուսանկարիչը պատրաստվում էր նկարահանման  մեկնել Աֆրիկա, սակայն նրան հանձնարարեցին մեկնել Փարիզ՝լուսանկարելու երաժիշտներին:

«Ինքս ինձ լուրջ ֆոտոլրագրող էի համարում ու չէի ուզում ռոքնռոլյան պատմություն լուսաբանել», - պատմում է լուսանկարիչը:

Բայց հենց այն պահին, երբ Բենսոնը հանդիպեց խմբի անդամներին ու լսեց նրանց կատարումները, արդեն անկարող էր հեռանալ՝ «Մտածեցի՝ Աստված իմ, ճիշտ ուղղու վրա եմ»: The Beatles-ն արդեն մեծ փառք ունեցող խումբ էր, իսկ Բենսոնը նոր էր սկսում ճանաչում ձեռք բերել:

Լուսանկարն արվել է George V հյուրանոցում: Այդ գիշեր տղաներն իմացան, որ «I Want to Hold Your Hand» երգը թիվ մեկ հիթն է դարձել ԱՄՆ-ում: Լուսանկարելու ընթացքում Բենսոնը աշխատել է առանց օգնականների:

«Փոլը վիսկի էր խմում, Ջոնը վազեց ու վերցրեց բարձը՝ հենց այդպես էլ ամեն ինչ սկսվեց: Այնքան էին ծիծաղում, մոտ 20 րոպե շարունակում էին «ծեծել» միմյանց: Ամեն շարժումը՝ երջանկություն էր, նրանք իսկապես ուրախ էին»:

Հետո Բենսոնը վերադարձավ իր սենյակ, հենց լողասենյակում երեւակեց ժապավենն ու չորացրեց այն հասարակ ֆենով:

Հաջորդ ամիս Բենսոնը տղաների հետ ուղեւորվեց Նյու Յորք ու մասնակցեց Էդ Սալիվանի հայտնի շոուին: Այդ համատեղ ճանապարհորդությունից հետո էլ լուսանկարիչը շարունակեց համագործակցել խմբի հետ:

Time ամսագիր
Պատրաստեց Լենա Գեւորգյանը