Վազգեն Սարգսյանի անվան ռազմական ինստիտուտն 2014 թվականին առաջին անգամ աղջիկների ընդունելություն է կատարել: Մեդիամաքսը «Վաշտի աղջիկները» հատուկ նախագծում ներկայացնում է զինվորական գործը որպես մասնագիտություն ընտրած յոթ աղջիկներին: Շարքի այսօրվա հերոսը կուրսանտ Լուսինե Պողոսյանն է:
«Ռազմական գործն ավելի պատվաբեր է...»
Լուսինե Պողոսյանը 18 տարեկան է: Ծնվել եւ մեծացել է Արարատի մարզի Հովտաշեն գյուղում: Մանկուց երազել է `կամ ռազմական գործն է ընտրելու որպես մասնագիտություն, կամ պարը:
«Երբ եկավ որոշում կայացնելու ժամանակը, հասկացա, որ ռազմական գործում ավելի պատվաբեր է, իսկ հայրենասիրությունն ավելի շատ է իմ մեջ»:
Լուսանկարը` Մեդիամաքս
Հայրն է քաջալերել
Լուսինեի հայրն ազատամարտիկ է, մասնակցել է Արցախյան պատերազմին, ինչն էլ փոքր հասակից նրա մեջ սեր է արթնացրել բանակի հանդեպ:
«Հայրս միշտ ասում էր` կողմնորոշվիր: Երբ հայտնեցի որոշմանս մասին. ասաց` «Առավոտյան քանիսի՞ն արթնանաք, որ գնաք զինվորական կոմիտե: Նա միշտ ինձ քաջալերել է այս հարցում»:
Կարճ ժամանակում Լուսինեն սովորել է առավոտյան վաղ արթնանալուն, խիստ կարգ ու կանոնին, բայց զբաղվածության հետ մեկտեղ ժամանակ է գտնում նաեւ հարդարանքի համար:
Հրետանավորը բանակի ուղեղն է, պատերազմի Աստվածը…
Լուսինեն հրետանավոր է դառնալու: Ասում է. «Հրետանավորը բանակի ուղեղն է, պատերազմի Աստվածը: Այդ գործը եւ ֆիզիկական ուժ է պահանջում, եւ գաղափարական մոտեցում»:
Լուսինե ՊողոսյանըԼուսանկարը` Մեդիամաքս
Ռազմական գործով զբաղվելը Լուսինեի կյանքի համար խոչընդոտ չի կարող լինել:
«Ցանկանում եմ, որ ամուսինս էլ հայրենիքին ծառայի ու լավ զավակներ ունենանք»,- ասում է նա:
Աղջիկների ներկայությունը բանակում եւ ռազմականին ինստիտուտում Լուսինեն կարեւոր է համարում:
«Այն մեծ ազդեցություն է ունենում ինչպես կուրսանտների, այնպես էլ սպաների պահվածքի ու խոսելաձեւի վրա»:
«Եթե հագնում եմ այս հագուստը, պետք է լինեմ լավագույնը»
«Համազգեստ կրելիս պատասխանատվությունը հայրենիքի ու ամեն ինչի հանդեպ ավելի է մեծանում. եթե նպատակ ունեն իմ առջեւ եւ հագնում եմ այս հագուստը, պետք է լինեմ լավագույնը եւ, անհրաժեշտության դեպքում, ամեն հնարավոր բան անեմ, որ հայրենի հողից թեկուզ մեկ թիզ չկորի»:
Լուսանկարը` Մեդիամաքս
Լուսինեն սիրում է ստեղծագործել, ազատ ժամանակ ունենալու դեպքում բանաստեղծություններ է գրում: Ասում է՝ լավ է ծառայելու. վստահ է` լավ ծառայության դեպքում կոչումները կբարձրանան:
Զրուցեց Սիրանուշ Եղիազարյանը
Լուսանկարները` Մարիամ Լորեցյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: