2017 թվականի հոկտեմբերի 11-ին Սոչիում կայացել էր ԱՊՀ երկրների ղեկավարների գագաթնաժողովը եւ Եվրասիական տնտեսական խորհրդի նիստը:
Ընդմիջումներից մեկում Հայաստանի նախագահի անձնական լուսանկարիչ Դավիթ Հակոբյանը լուսանկարել է Ղազախստանի նախագահ Նուրսուլթան Նազարբաեւին՝ ստեղծելով շատ յուրահատուկ դիմանկար:
Մեդիամաքսը խնդրեց Դավիթ Հակոբյանին պատմել այն մասին, թե ինչպես ծնվեց լուսանկարը:
«Այդ վայրի յուրահատուկ լուսավորությունը նախապես էի նկատել եւ ցանկանում էի ՀՀ նախագահին այդտեղ լուսանկարել: Սակայն երբ նախագահները նիստերի դահլիճից դուրս եկան, առաջինը եկավ Նազարբաեւը, իսկ նրա հետեւից զրուցելով գալիս էին Սերժ Սարգսյանը եւ Վլադիմիր Պուտինը: Այնպես որ մեր նախագահին չկարողացա նկարել այնպես, ինչպես ցանկանում էի, բայց փոխարենը ստացվեց այս լուսանկարը: Հաշվի առնելով, որ Նազարբաեւը ԱՊՀ ստեղծողներից մեկն է, կարծում եմ, խորհրդանշական նկար է ստացվել», - պատմել է Դավիթը:
Լուսանկարը` Դավիթ Հակոբյան
Նա խոստովանում է, որ նկարելու պահին չէր զգում, որ լուսանկարն հենց այդպիսին կստացվի:
«Արդյո՞ք Ղազախստանի նախագահը նկատել էր, որ լուսանկարում ես իրեն» հարցին Դավիթը պատասխանում է.
«Չնկատելն անհնարին էր, քանի որ այդ վայրում մի քանի տասնյակ լուսանկարիչ էր աշխատում»:
Դավիթը պատմում է, որ լուսանկարը ցույց է տվել Նուրսուլթան Նազարբաեւի մամուլի քարտուղարին, որն այն շատ է հավանել եւ խնդրել է ուղարկել իրեն:
Ամենայն հավանականությամբ, լուսանկարն արդեն տարածվել է Ղազախստանում՝ հոկտեմբերի 12-ի առավոտյան Դավիթը մի քանի հեռախոսային հարցազրույց է տվել ղազախստանյան լրատվամիջոցներին:
Արա Թադեւոսյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: