Երեւան: Մեդիամաքս: Ապրիլի 4-ին Հայաստանում կմեկնարկեն «Ղրիմի օրերը»։
Այս մասին, ինչպես հայտնում է ՏԱՍՍ-ը, լրագրողներին հայտնել է Ղրիմի փոխվարչապետ Գեորգի Մուրադովը։
«Առաջիկա օրերին Հայաստանում կանցկացնենք Ղրիմի օրերը։ Այնտեղ մեզ սպասում են, հանրությանը հետաքրքրում է այն ամենը, ինչ կատարվում է Ղրիմում։
Կանցկացվեն Ղրիմի եւ Հայաստանի բիզնեսների հանդիպումներ, հանդիպումներ հանրության հետ, ելույթներ, կոնֆերանսներ, մեր ստեղծագործական կոլեկտիվների ելույթներ։ Դրանք լիարժեք միջոցառումներ են»,- ասել է Մուրադովը։
Մեդիամաքսը նշում է, որ Հայաստանում «Ղրիմի օրերի» կազմակերպիչը «Սահմանադրական Իրավունքի Միություն» կուսակցության նախագահ, «Ղրիմի ընկերներ» ակումբի ղեկավար Հայկ Բաբուխանյանն է:
