Guitar World ամսագրի հետ հարցազրույցում Queen-ի կիթառահար Բրայան Մեյը մեկնաբանել է «Բոլոր ժամանակների 100 մեծագույն կիթառահարները» հարցման արդյունքները, որում նա գրավել է առաջին տեղը։

Մեդիամաքսը ներկայացնում է հարցազրույցի այն հատվածները, որտեղ Բրայան Մեյը խոսում է իր գործընկերների մասին:

Ջիմի Հենդրիքս

Ջիմին ինձ համար թիվ մեկն է, եւ ես միշտ դա ասել եմ: Իմ կարծիքով՝ նա գերմարդ էր: Թվում էր, նա եկել է մեկ այլ մոլորակից։ Ես երբեք չեմ իմանա, թե ոնց էր նա այդպե՛ս նվագում։

Երիտասարդ Բրայան Մեյը

 

Չեմ դադարում սովորել նրանից: Հիմա հազվադեպ եմ կատարում նրա գործերը, բայց դրանք վաղուց արդեն «իմ ներսում» են:

Ջիմի Փեյջ

Մենք նույն տարրական դպրոցն էինք հաճախում, բայց նա երկու-երեք տարով մեծ էր։ Երբ փոքր ես, այդ տարբերությունը հսկայական է թվում։ Ի դեպ, այժմ մենք իրարից այդքան էլ հեռու չենք ապրում:

Ես նրան համարում եմ մեծ գյուտարար: Եվ նա հսկայական դեր ունեցավ ծանր ռոքում։ Ես երբեք չեմ հոգնում Led Zeppelin-ի ալբոմները լսելուց:

Բրայան Մեյը, Փոլ Ռոջերսը եւ Ջիմի Փեյջը

Լուսանկարը` Փոլ Ռոջերսի թվիթերը

Երբ երիտասարդ էինք, երազում էինք, որ մի օր ռոք աստղեր կդառնանք ու նրանց պես կապրենք։ Երբ ես լսում էի նրանց Communication Breakdown, Good Times Bad Times երգերը,  մտածում էի. «Աստվա՛ծ իմ, նրանք անում են այն, ինչ ես էի ուզում անել, այնպես որ կամ պետք է հանձնվեմ, կամ էլ ավելի համառորեն աշխատեմ»:

Էրիկ Քլեփթոն

Իհարկե, նա իմ հերոսն է: Ինչպես  ասում են «Օսկարի» մրցանակաբաշխության ժամանակ. «Հրաշալի է լինել նման շրջապատում, ինձ համար դա մեծ պատիվ է»:

Էդի Վան Հալեն

Էդին անհամեմատելի է: Նա էլեկտրական կիթառ նվագելու տեխնիկայի զարգացման հիմնասյուներից մեկն է: Եվ նա հիանալի՛ տղա է: Կարանտինի ժամանակ սկսում ես կյանքին այլ կերպ նայել եւ հասկանալ, որ հեռվացել ես որոշ մարդկանցից։

Բրայան Մեյը, Թոնի Այոմին եւ Էդի Վան Հալենը 1978 թվականին

 

Ես վաղուց չեմ խոսել Էդիի հետ եւ զղջում եմ դրա համար: Նա ֆանտաստիկ տղա է՝ ոչ միայն անվանի կատարող, այլեւ բացառիկ հատկանիշներով մարդ։

Թոնի Այոմի

Երկար տարիներ նա իմ ամենաթանկ ընկերներից մեկն է: Ես կարող էի գրքեր գրել Թոնիի մասին, քանի որ նա ամենա…Չգիտեմ անգամ, թե ինչպես բնութագրել նրան: Նա փայլուն մարդ է, հիանալի ու բարի հոգի ունի եւ հումորի բացառիկ զգացողություն։

Բրայան Մեյը եւ Թոնի Այոմին

 

Եվ իհարկե, նա հեվի մետալի հայրն է: Նա դա արել է իր մատներով ու մտքով, եւ այդ տիտղոսը միշտ իրենն է լինելու։

Դէվիդ Գիլմոր

Ես սիրում եմ նրան ու մեծագույն հարգանք եմ տածում նրա նկատմամբ: Ես տեսել եմ նրա առաջին համերգներից մեկը՝ Pink Floyd-ի հետ, եւ ես այն երբեք չեմ մոռանա: Նա անհավանական բաներ էր անում, շշով կիթառ էր նվագում։ Նա միշտ եղել է իմ ամենասիրելի կատարողներից մեկը:

Դէվիդ Գիլմորը եւ Բրայան Մեյը Rock Aid Armenia ձայնագրության ժամանակ 1989 թվականին

Լուսանկարը` Michael Putland

Մի օր մենք միասին նվագեցինք Հայաստանի համար: Ես խնդրեցի, որ նա մեզ հետ կատարի Smoke On The Water-ը՝ 1989-ին, Rock Aid Armenia նախագծի համար։

Ռիչի Բլեքմոր

Նա իմ մյուս հերոսն է: Նա խենթ է: Կարծում եմ, որ նա բոլոր ժամանակների ամենավտանգավոր կիթառահարներից մեկն է՝ բառիս լավագույն իմաստով: Նա գերազանցում էր բոլորիս: