Երեւան: Մեդիամաքս: Երեւանի քաղաքապետի տեղակալ Տիգրան Վիրաբյանն այսօր հայտնել է, որ Հանրապետության հրապարակի շատրվանների տարածքում նոր մոտեցումներով ու դեկորներով ժամանակակից հեքիաթային քաղաք է կառուցվում:

«Տոնական միջոցառումների համար այս տարածքում ժամանակավոր կոնստրուկցիաներով վերգետնյա անցում կկառուցվի, որպեսզի հնարավորություն ունենանք ապահովել քաղաքացիների անվտանգ երթեւեկությունը»,- լրագրողների հետ հանդիպմանն ասել է փոխքաղաքապետը:

Տիգրան Վիրաբյանը հիշեցրել է, որ դեկտեմբերի 21-ին՝ ժամը 20:00-ին, կվառվեն գլխավոր տոնածառի լույսերը, եւ արարողությունը կուղեկցվի հայկական մոտիվներով համաշխարհային ամանորյա հիթերից կազմված մյուզիքլով:

Լույսերի վառման արարողությանը կհաջորդի ամանորյա տոնավաճառի բացումը Երեւանի 2750-ամյակի այգում: 

Դեկտեմբերի 31-ին՝ ժամը 22:00-ին, հայ արտիստները կներկայացնեն իրենց ստեղծագործությունները, կլինի նաեւ «Երեւան 2020» ամանորյա ծրագրերի համար գրված երգի պրեմիերա, որից հետո՝ 23:45-ին, Հանրապետության հրապարակից ՀՀ վարչապետ Նիկոլ Փաշինյանը հանդես կգա ամանորյա ուղերձով: Այն ուղիղ կհեռարձակվի: 

«Այնուհետեւ կլինի Գորան Բրեգովիչի ու իր նվագախմբի համերգը, որից հետո էլ տոնական միջոցառումը կշարունակվի մինչեւ լուսաբաց»,- մանրամասնել է փոխքաղաքապետը:

2020թ. հունվարի 5-ին կլինի մանկական համերգ-ներկայացում: 

Տոնական միջոցառումները կավարտվեն 2020-ի հունվարի 13-ին:

Անդրադառնալով միջոցառումների ծախսային մասին՝ Տիգրան Վիրաբյանն ասել է. 

«Երեւանի համայնքային բյուջեից տրամադրվում է 158 մլն դրամ, դրան գումարվում է կառավարության պահուստային ֆոնդից տրամադրված 271 մլն-ը»: 

Նա հայտնել է, որ Գորան Բրեգովիչի եւ խմբի հետ կնքված պայմանագրի արժեքը կազմում է €65 000: