Երեւան: Մեդիամաքս: Վերակառուցման եւ զարգացման եվրոպական բանկի (ՎԶԵԲ) առաջին փոխնախագահ Յուրգեն Ռիգտերինկը Մեդիամաքսին տված բացառիկ հարցազրույցում խոսել է Ամուլսարի խնդրի մասին:
ՎԶԵԲ-ը Lydian International ընկերության բաժնետերն է:
«Յուրաքանչյուր նախագծի համար մենք զգուշորեն հավասարակշռում ենք դրա տնտեսական բաղադրիչը հնարավոր սոցիալական եւ բնապահպանական ռիսկերի հետ։
ՎԶԵԲ-ը ներգրավվում է այն ծրագրերում, որոնք երաշխավորում են բնապահպանական եւ սոցիալական ամենաբարձր չափանիշները։ Հետեւաբար, Լիդիանի բաժնետեր հանդիսանալը նշանակում է, որ այս կազմակերպությունը համապատասխանում է եւ շարունակելու է համապատասխանել միջազգային չափանիշներին։
Մենք հասկանում ենք, որ կան կողմեր, որոնք լուրջ մտահոգություններ ունեն։ Ուստի հասկանում ենք, որ ճիշտ որոշում կայացնելու համար նրանց ավելի շատ ժամանակ է անհրաժեշտ: Կարծում եմ, բոլոր կողմերի շահերից է բխում ծախսել այնքան ժամանակ, որքան պետք է ճիշտ որոշում կայացնելու համար։
Որոշում կայացնելն անհրաժեշտություն է, եթե ուզում եք արտաքին ներդրողներ ներգրավեք: Նրանք պետք է զգան, որ երկրում կայուն ներդրումային մթնոլորտ է եւ իրենք կարող են ակնկալել կառավարության աջակցությունը։
Կարծում եմ, որ մենք մոտ ենք խնդրի հանգուցալուծմանը: Կարծում եմ, կառավարության կողմից խոհեմ քայլ էր լրացուցիչ արտաքին ուսումնասիրություն ներգրավվելը՝ ընկերության (Լիդիանի-խմբ.) ասածների իսկությունը հաստատելու համար։ Վարչապետն անձամբ այցելել է այդ տարածքը եւ զրուցել է քաղաքացիների հետ։ Կարծում ենք, որ կառավարությունը բավականաչափ ճիշտ քայլեր է կատարել», - Մեդիամաքսին ասել է Յուրգեն Ռիգտերինկը:
