Երեւան: Մեդիամաքս: Հայաստանի բնապահպանության նախարար Էրիկ Գրիգորյանն այսօր ասել է, որ Ամուլսարի տարածքում տեսչական մարմնի կողմից հայտնաբերված «Ապոլո» թիթեռի համար այդ տարածքը բնակավայր լինել չի կարող, իսկ հայտնաբերված բույսը եղել է ոչ թե «Ոզնաթուփ մեխակ», այլ այդ ընտանիքին պատկանող մեկ այլ բույս, որը «Կարմիր գրքում» գրանցված չէ:
Էրիկ Գրիգորյանի հրամանով ստեղծվել է աշխատանքային խումբ, որը բնապահպանության եւ ընդերքի տեսչական մարմնի առաջարկի հիման վրա լրացուցիչ ուսումնասիրություններ է կատարել Ամուլսարի հանքավայրի տարածքում:
Նախարարն ասել է, որ աշխատանքային խմբում ներգրավվել են Գիտությունների ազգային ակադեմիայի եւ բնապահպանության նախարարության ներկայացուցիչներ, տեսչական մարմնի՝ Վայոց Ձորի տեղամասի ղեկավարը, ով հանդիսացել է այդ ստուգումների ղեկավարը, Վայրի Բնության հիմնադրամի աշխատակիցները:
Խումբը ուսումնասիրությունները կատարել է սեպտեմբերի 4-ին եւ կազմել է արձանագրություններ այն մասին, որ այս հատվածում չկա այն բույսը, որի վրա ձվադրում է այդ թիթեռը, իսկ տվյալ վայրը չի կարող հանդիսանալ թիթեռի բնակավայր:
