Երեւան: Մեդիամաքս: System of a Down ռոք-խմբի երգիչ, հասարակական գործիչ Սերժ Թանգյանը մտադիր է Հայաստանում միջազգային երաժշտական փառատոն կազմակերպել:

AFP-ի հետ զրույցում նա ասել է, որ գաղափարը դեռեւս նախնական փուլում է:

Սերժ Թանգյանը հույս է հայտնել, որ Հայաստանը հնարավոր կլինի ինտեգրել եվրոպական ամառային փառատոնների ծրագրերում, ինչը հնարավորություն կտա արեւմտյան խմբերին այցելել նաեւ Երեւան:

«Միշտ երազել եմ Հայաստանում նման միջազգային փառատոն հիմնելու մասին», - ասել է Սերժ Թանգյանը:

Մեդիամաքսը հիշեցնում է, որ 2015 թվականի ապրիլի 23-ին System of a Down-ը անմոռանալի համերգ տվեց Երեւանի Հանրապետության հրապարակում:

Սերժ Թանգյանն ասել է, որ այդ համերգի ընթացքում նայում էր երիտասարդներին ու հիշում էր իր նախնիներին:

«Որոշ իմաստով կարող եմ ասել, որ System of a Down-ի ողջ կարիերան կառուցվել էր այդ մեկ համերգը տալու համար», - ասել է Սերժ Թանգյանը:

Մեդիամաքսը հիշեցնում է, որ ս.թ. ապրիլին Սերժ Թանգյանը, Ատոմ Էգոյանը եւ Արսինե Խանջյանը այցելել էին Հայաստան եւ Արցախ: