Երեւան: Մեդիամաքս: «Ավրորա» մրցանակի ընտրող հանձնաժողովի համանախագահ Ջորջ Քլունին այսօր այցելել է UWC Dilijan քոլեջ:
Քոլեջում Ջորջ Քլունին հանդիպել է լիբանանցի Պամելա Թեբչրանիի հետ՝ 100 Lives-ի հիմնադրած՝ Ամալ Քլունիի անվան ամենամյա կրթաթոշակին արժանացած առաջին ուսանողուհու հետ:
Ամալ Քլունիի անվան կրթաթոշակի միջոցով յուրաքանչյուր տարի Լիբանանից մեկ աշակերտուհի կսովորի Դիլիջանի քոլեջում՝ Միջազգային բակալավրիատ ծրագրով:
Կրթաթոշակը կշնորհվի օրինակելի ակադեմիական ունակություններ եւ մարդու իրավունքների ու միջազգային հարցերի շուրջ հետաքրքրություն դրսեւորած մասնակցին:
Ամալ Քլունիի անվան ամենամյա կրթաթոշակի մասին հայտարարվեց 2015 թվականի դեկտեմբերին:
«Այս կրթաթոշակը երիտասարդ լիբանանցի աղջիկներին կտա կյանքի ամենամեծ հնարավորություններից մեկը: Միջմշակութային կրթությունը եւ արտասահմանում սովորելը կարող է բեկումնային փոփոխություն ունենալ նրանց կյանքում: Ես շնորհակալ եմ «100 կյանք» նախագծին՝ երիտասարդ եւ պայծառ երիտասարդների առջեւ նոր դռներ բացելու համար»,- այն ժամանակ ասել էր Ամալ Քլունին:
