Երեւան: Մեդիամաքս: Վրաստանը միանում է տիեզերքի ուսումնասիրման նախագծին եւ պատրաստվում է խաղող մշակել Մարսի վրա:
Այդ մասին հայտնում է «Նովոստի-Գրուզիա»-ն, վկայակոչելով Վրաստանի Ազգային թանգարանը:
«NASA-ի տիեզերագնացները արդեն տիեզերական կայանում սննդամթերք աճեցնելու մի քանի հաջող փորձեր են իրականացրել: Այդ ուղղությամբ աշխատելու համար Վրաստանի ներուժը եզակի է, քանի որ կապված է խաղողի աճեցման ամենահին մշակույթի հետ», - ասված է թանգարանի հաղորդագրության մեջ:
Խաղողի մշակման նախագծի իրականացման նպատակով կստեղծվի աշխատանքային խումբ՝ Վրաստանի կրթության եւ գիտության նախարարության, Ազգային թանգարանի, Բիզնեսի եւ տեխնոլոգիաների համալսարանի, Microsoft եւ Space Farms ընկերությունների ներկայացուցիչների մասնակցությամբ:
Թբիլիսիի «Սամբա» հյուրանոցում 2018 թվականի սեպտեմբերից կգործարկվի ջերմոց-լաբորատորիա, որտեղ կաճեցնեն, կուսումնասիրեն եւ կզարգացնեն խաղողի հատուկ տեսակներ: Գործընթացը կընթանա Եվրոպական տիեզերական գործակալության մասնագետների մասնակցությամբ:
