Երեւան: Մեդիամաքս: Հայաստանում ձեւավորված է պոտենցիալ լավ ընտրական համակարգ, որը հնարավորություն կտա անցկացնելու ազատ եւ արդար ընտրություններ:
Ինչպես Ստրասբուրգից հաղորդում է Մեդիամաքսի հատուկ թղթակիցը, այս մասին ասել է Եվրոպայի Խորհրդի Վենետիկյան հանձնաժողովի քարտուղարի տեղակալ Սիմոնա Գրանատա-Մենգինին (Simona Granata-Menghini):
Նա նշել է, որ Հանձնաժողովն անմիջական մասնակցություն է ունեցել այս տարվա մայիսին ՀՀ Ընտրական օրենսգրքում կատարված փոփոխությունների մշակմանը: Սիմոնա Գրանատա-Մենգինիի կարծիքով, փոփոխություններից մեկը վերաբերում է բոլոր մակարդակի ընտրական հանձնաժողովների ձեւավորման սկզբունքին:
ԵԽ Վենետիկյան հանձնաժողովի քարտուղարի տեղակալը նշել է, որ «օրենսդրական մասը միայն սկիզբն է, գլխավորը` պրակտիկան եւ օրենքի իրականացումն է»:
