Երեւան: Մեդիամաքս: ԵՄ արտաքին քաղաքականության եւ անվտանգության հարցերով գերագույն հանձնակատար Ֆեդերիկա Մոգերինին կոչ է արել Լեռնային Ղարաբաղի հակամարտության կողմերին անհապաղ դադարեցնել ռազմական գործողությունները:
«Շփման գծի երկայնքով բախումների մասին տեղեկությունները չափազանց մտահոգիչ են: Ես կոչ եմ անում կողմերին անմիջապես դադարեցնել կրակը եւ հարգել հրադադարի ռեժիմը: Կողմերը պետք է զսպվածություն ցուցաբերեն եւ խուսափեն հետագա գործողություններից կամ հայտարարություններից, որոնք կարող են էլ ավելի սրել իրավիճակը»,- ասել է Ֆեդերիկա Մոգերինին:
Եվրամիությունն ափսոսանք է հայտնել զոհերի, հատկապես խաղաղ բնակչության շրջանում կորուստների առթիվ:
«ԵՄ-ն ամբողջապես աջակցում է ԵԱՀԿ Մինսկի խմբի համանախագահների ջանքերը: Մենք ակնկալում ենք կողմերից խստիվ հարգել հրադադարը, զերծ մնալ ուժի կիրառումից եւ վերսկսել ջանքերը՝ ուղղված ԼՂ հիմնախնդրի խաղաղ կարգավորմանը»,- ասված է ԵՄ բարձր ներկայացուցչի հայտարարության մեջ:
