Երեւան: Մեդիամաքս: Հայաստանի արտաքին գործերի նախարար Արարատ Միրզոյանն ասել է, որ «խաղաղությունը կարող է վտանգվել Ադրբեջանի պատճառով»։
Հայաստանի ԱԳՆ հաղորդագրության համաձայն, բրազիլական Correio Braziliense պարբերականի հետ հարցազրույցում նախարարն ասել է.
«Ցավոք, այն, ինչ մենք լսում ենք ադրբեջանական կողմից, այսպես է հնչում.
«Մենք համաձայն ենք տեքստի հետ, բայց դա բավարար չէ խաղաղության համաձայնագրի համար։ Անհրաժեշտ է նաեւ նախապայմանների շարք քննարկել բանակցային սեղանին՝ խաղաղության պայմանագրի ստորագրումը հնարավոր դարձնելու համար»։
Այս նախապայմանները ներառում են փոփոխություններ Հայաստանի Սահմանադրության մեջ եւ սահմանափակումներ Հայաստանի Հանրապետություն մատակարարվող զինամթերքի ու սպառազինության հարցում»:
«Այո, մենք համաձայնեցրել ենք պայմանագրի նախագիծը, բայց Ադրբեջանը հանդես է գալիս նախապայմաններով եւ դրական չի պատասխանում մեր մյուս առաջարկներին, որոնք կարող էին բերել իրական եւ երկարատեւ խաղաղություն Հարավային Կովկասում», - հավելել է Արարատ Միրզոյանը:
