Երեւան: Մեդիամաքս: Դեկտեմբերի 5-ին Վալետայում ընթացող ԵԱՀԿ նախարարական խորհրդի շրջանակներում Հայաստանի արտաքին գործերի նախարար Արարատ Միրզոյանը հանդիպում է ունեցել նորդիկ-բալթյան (NB8) երկրների ԱԳ նախարարների եւ ներկայացուցիչների հետ։
Նորդիկ-Բալթյան երկրների ձեւաչափում ներգրավված են Շվեդիան, Ֆինլանդիան, Իսլանդիան, Էստոնիան, Լիտվան, Լատվիան, Դանիան եւ Նորվեգիան։
Հանդիպման արդյունքներով հրապարակվել է համատեղ մամուլի հաղորդագրություն.
«Նորդիկ-բալթյան երկրները վերահաստատեցին հարաբերությունների ամրապնդման հարցում փոխադարձ հետաքրքրվածությունը եւ ամուր աջակցություն հայտնեցին Հայաստանի՝ ԵՄ-ի եւ նրա եվրոպական գործընկերների հետ կապերը խորացնելու ձգտմանը։
Հայաստանը կիսում է այն ժողովրդավարական արժեքները եւ մարդու իրավունքների նկատմամբ հարգանքը, որոնք դրված են նորդիկ-բալթյան եւ եվրոպական համայնքների հիմքում։ Նորդիկ-Բալթյան երկրները բարձր են գնահատում Հայաստանի նվիրվածությունը ժողովրդավարական բարեփոխումներին եւ շարունակելու են աջակցել Հայաստանի բարեփոխումների ջանքերին։
ԵՄ-ում նորդիկ-բալթյան երկրներն ակնկալում են Հայաստանի եւ ԵՄ-ի միջեւ նոր եւ հավակնոտ Գործընկերության օրակարգի ընդունումը՝ Եվրոպական խորհրդի 2023 թվականի հոկտեմբերի՝ Հայաստան-ԵՄ հարաբերությունները բոլոր ուղղություններով ամրապնդելու վերաբերյալ եզրակացություններին համահունչ։ Նորդիկ-բալթյան երկրները ճանաչում են ԵԱՀԿ-ի հանձնառությունը՝ շարունակելու համագործակցությունը Հայաստանի հետ անվտանգության բոլոր երեք հարթակներում։
Նորդիկ-բալթյան երկրներն աջակցում են Հայաստանի եւ Ադրբեջանի միջեւ կայուն խաղաղության համաձայնագրի հասնելու ջանքերին՝ հիմնված ինքնիշխանության եւ տարածքային ամբողջականության նկատմամբ փոխադարձ հարգանքի վրա՝ համաձայն 1991 թվականի Ալմա-Աթայի հռչակագրի, եւ ողջունում են նախաձեռնությունները, այդ թվում՝ «Խաղաղության խաչմերուկ» ծրագիրը, որը նպատակ ունի խթանելու տարածաշրջանային կապերն ու տնտեսական համագործակցությունը»։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: