Երեւան: Մեդիամաքս: Եվրոպական միությունն ողջունում է սահմանազատման գործընթացում ձեռք բերված առաջընթացը եւ վերահաստատում է իր լիակատար աջակցությունը Հայաստանի ինքնիշխանությանն ու տարածքային ամբողջականությանը եւ Հայաստանի սահմանների անձեռնմխելիությանը 1991 թվականի Ալմա-Աթայի հռչակագրի հիման վրա։
Այդ մասին ասվում է Եվրոպական միության եւ Հայաստանի համատեղ հայտարարության մեջ, որն ընդունվել է Երեւանում կայացած ԵՄ-Հայաստան Գործընկերության կոմիտեի հինգերորդ հանդիպման արդյունքներով:
«Կողմերն անդրադարձել են Ադրբեջանի կողմից Լեռնային Ղարաբաղում 2023 թվականի սեպտեմբերի ռազմական գործողությունից հետո բռնի տեղահանված հայ բնակչության ներառմանը, ինչպես նաեւ բնակարանային ապահովման եւ զբաղվածության հարցերում ԵՄ աջակցությանը», - ասված է հայտարարության մեջ:
Գործընկերներն անդրադարձել են Հայաստանում ԵՄ առաքելությանը՝ բարձր գնահատելով նրա դերը տարածաշրջանում անվտանգության եւ կայունության ապահովման գործում:
«Կողմերը քննարկել են անվտանգության եւ պաշտպանության հարցերում իրենց երկխոսության ամրապնդումը, ինչպես նաեւ Խաղաղության Եվրոպական գործիքի շրջանակներում Հայաստանի ընթացիկ հայցը», - ասված է փաստաթղթում:
«ԵՄ-ն ողջունել է Հայաստանի «Խաղաղության խաչմերուկ» նախաձեռնությունը՝ միտված տարածաշրջանում խաղաղության հաստատմանը եւ հարաբերությունների կարգավորմանը եւ իր աջակցությունն է հայտնել տարածաշրջանային տրանսպորտային ուղիների բացմանը՝ երկրների ինքնիշխանության, ազգային իրավազորության, ինչպես նաեւ հավասարության եւ փոխադարձության սկզբունքների հիման վրա», - նշված է համատեղ հայտարարության մեջ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: