Երեւան։ Մեդիամաքս։ Մոսկվան Երեւանից պարզաբանում է հայցել ՆԱՏՕ-ի հետ համատեղ զորավարժություններին Հայաստանի մասնակցության վերաբերյալ։
«Մեր արձագանքը կորոշվի պատասխանը ստանալուց հետո»,- ասել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ հանդես գալով ճեպազրույցում։
«Անշուշտ, Երեւանի հրաժարումը իր տարածքում ՀԱՊԿ զորավարժություններ անցկացնելուց ցավալի է եւ չի նպաստում տարածաշրջանային անվտանգության ամրապնդմանը», - ՏԱՍՍ-ը մեջբերում է Զախարովայի խոսքերը։
Նա նշել է, որ ՆԱՏՕ-ն շարունակում է իր զորավարժություններին գործընկեր երկրներին ակտիվորեն ներգրավելու պրակտիկան եւ ձգտում է վերափոխել այդ պետությունների պաշտպանական համալիրները, ազդեցության լծակներ ձեռք բերել նրանց ներքին եւ արտաքին քաղաքական գործընթացներում։
«ՆԱՏՕ-ի նման գործողությունները հանգեցնում են տարբեր տարածաշրջաններում իրավիճակի ապակայունացման, հակամարտությունների ներուժի աճի, բաժանարար նոր գծերի ստեղծմանը», - ասել է Մարիա Զախարովան։
