«Վիքիմեդիա Հայաստան» ՀԿ-ի նախագահ Սուսաննա Մկրտչյանը մշտապես աշխատում է Հայաստանում Վիքիմեդիա նախագծերը զարգացնելու ուղղությամբ եւ նորանոր նախաձեռնություններ է կյանքի կոչում:

Սուսաննան համոզված է, որ եթե մշտապես դժգոհենք երկրում տիրող իրավիճակից եւ ոչինչ չանենք, մեր շուրջը ոչինչ էլ դեպի լավը չի փոխվելու: Դրական փոփոխությունների գործում նա կարեւորում է կամավորության մշակույթի ներդրումը:

«Վիքիմեդիա Հայաստանի» ղեկավարը Մեդիամաքսին պատմել է, թե առաջիկայում ինչպիսի նոր նախաձեռնություններ են իրականացնելու՝ Վիքիպեդիայի խմբագիրների թիվն ավելացնելու եւ հայերեն Վիքիպեդիան հարստացնելու համար:

Վիքիպեդիա մանուկների համար

Մանկական օնլայն հանրագիտարան հիմնադրելու նախագիծ ունենք՝ Վիքիպեդիա մանուկների համար: Ուզում ենք գիտելիքն ավելի հասանելի լինի երեխաներին եւ մատչելի կերպով ներկայացվի: Վիքիպեդիայում որոշ թեմաներ բարդ լեզվով են գրված եւ երբեմն հասկանալի չեն երեխաների համար:

Այս գործում լավ օրինակ է ֆրանսերեն Վիքիպեդիայի մանկական բաժինը, եւ փորձելու ենք նմանատիպ հանրագիտարան ստեղծել  Հայաստանի երեխաների համար:

Առաջիկա Վիքիճամբարի ընթացքում երեխաները միայն մանկական Վիքիպեդիան կխմբագրեն: Սկզբում երեխաները Վիքիպեդիայի տեսքի կբերեն (մենք դա կոչում ենք վիկիֆիկացնել) «Ի՞նչ է, Ո՞վ է»  մանկական հանրագիտարանը, հետո կաշխատենք ավելի հարուստ եւ ժամանակակից բովանդակություն ստեղծելու ուղղությամբ:

Վիքի նախագիծ ուսուցիչների համար

Լավ կլիներ, եթե դպրոցների լավագույն ուսուցիչները կրթական հոդվածներով հարստացնեին Վիքիպեդիան: Այսպիսի նախագիծ իրականացվում է Հոլանդիայում:

Շուտով այս գաղափարը կներկայացնեմ ՀՀ կրթության եւ գիտության նախարարությանը: Կարծում եմ, այս նախագծի օգնությամբ կարելի է ստանալ ավելի մասնագիտացված, խորը եւ հավաստի գիտելիք:

Ճարտարապետական Վիքիպեդիա

Շատ կցանկանայի, որ ճարտարապետները՝ հատկապես երիտասարդ մասնագետները կամ ուսանողները, իրենց ներդրումն ունենային Վիքիպեդիան ճարտարապետությանն առնչվող թեմաներով հարստացնելու գործում:

Նախագծի նպատակն է ճարտարապետական հեշտ եւ մատչելի լուծումներ առաջարկել Հայաստանի գյուղական բնակավայրերում տների արտաքին տեսքը ավելի հետաքրքիր դարձնելու համար: Հավատում եմ, որ կան լուծումներ, որոնք կկարողանան գրավիչ դարձնել մեր բնակավայրերը:

Մարիամ Մանոյան