Երեւան: Մեդիամաքս: Երեւանի քաղաքապետի պաշտոնակատար Կամո Արեյանը այսօր ասել է, որ մայրաքաղաքի տարբեր հատվածներում ապօրինի բացօթյա առեւտուրը վերջին շրջանում հասել է մեծ ծավալների, եւ հարկավոր է կտրուկ գործողությունների դիմել՝ ապօրինությունները կանխարգելելու համար:
Քաղաքապետարանում կայացած խորհրդակցության ընթացքում Արեյանն ընդգծել է, որ կան առեւտրի համար առանձնացված վայրեր, եւ քաղաքապետարանի ու վարչական շրջանների ղեկավարների աշխատակազմերի համապատասխան բաժինների խնդիրն է բացառել առեւտուրը դրա համար չնախատեսված վայրերում: Առավել եւս, որ «Առեւտրի եւ ծառայությունների մասին» օրենքի պահանջներին համաձայն, կտրականապես արգելվում է մրգի, բանջարեղենի եւ այլ մթերքների բացօթյա վաճառքը:
ՀՀ ոստիկանության Երեւան քաղաքի վարչության պետ Արտակ Պողոսյանը նշել է, որ իրենք պատրաստակամ են օգնություն ցուցաբերել քաղաքապետարանի եւ վարչական շրջանների աշխատակազմերին եւ վճռական պայքար ծավալել բացօթյա ապօրինի առեւտրի կանխարգելման ուղղությամբ:
Կամո Արեյանը նաեւ առաջարկել է ՀՀ արտակարգ իրավիճակների նախարարությանը կտրուկ միջոցներ ձեռնարկել Հանրապետության հրապարակում եւ այլ վայրերում անհայտ ծագման գազի բալոնների օգտագործումն արգելելու ուղղությամբ, քանզի դրանց օգտագործումը կարող է հանգեցնել անկանխատեսելի հետեւանքների: Դրանց միջոցով տեղում որոշ տեսակի քաղցրավենիքների պատրաստումը եւ վաճառքն առաջացրել է մարդկանց առողջությանը սպառնացող հակահիգիենիկ իրավիճակ: Այդ առումով քաղաքապետի պաշտոնակատարն առաջարկել է նաեւ ՀՀ առողջապահության նախարարությանը եւ Սննդամթերքի անվտանգության պետական ծառայությանը կտրուկ քայլեր ձեռնարկել ստեղծված վիճակը վերացնելու ուղղությամբ:
Այսուհետ Երեւանի քաղաքապետարանի եւ վարչական շրջանների առեւտրի պատասխանատուները ոստիկանական խմբերի ուղեկցությամբ օրվա տարբեր ժամերին մայրաքաղաքի տարբեր փողոցներում, մարդաշատ վայրերում, հրապարակներում, այգիներում եւ պուրակներում ամենօրյա շրջայցներ են իրականացնելու:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: