Երեւան: Մեդիամաքս: Այսօրվանից մեկնարկում է Երեւանի քաղաքապետարանի «Երեւանը իմ տունն է» սոցիալական արշավը:
Արշավի հիմնական նպատակն է հորդորել Երեւանի քաղաքացիներին ավելի հոգատար լինել մայրաքաղաքի հանդեպ, հոգ տանել նրա մաքրության մասին:
«Երեւանը իմ տունն է» նախագծի համար նկարահանվել են երեք տեսահոլովակներ, որոնց հերոսներն են երգիչներ Արամոն եւ Ֆորշը: Հոլովակներում նրանք կերպարանափոխված են ու հանդես են գալիս Երեւանի մաքրությամբ զբաղվող մարդկանց դերում: Արամոն ու Ֆորշը համարվում են “երեւանյան քաղաքային մշակույթի” կրողները եւ հենց դրանով է պայմանավորված նրանց կերպարների ընտրությունը:
Տեսահոլովակներում հնչում է Առնո Բաբաջանյանի երաժշտությունը, որը լավագույն կերպով արտացոլում է Երեւանի աուրան:
Մոտակա օրերին տեսահոլովակները կլինեն նաեւ հայկական հեռուստաընկերությունների եթերում:
Արշավի ընթացքում նախատեսվում է Երեւանում տեղակայել նաեւ տպագիր պաստառներ, ինչպես նաեւ ինտերնետային բաններներ:
«Երեւանը իմ տունն է» նախագծի կոնցեպցիան եւ տեսահոլովակների սցենարները մշակվել են «Մեդիաբրենդ» ընկերության կողմից:
Տեսահոլովակները հասանելի են համացանցում, հետեւյալ հղումներով.
http://www.youtube.com/BRAVoarmenia#p/u/2/hmE0HSl891k
