Դեկտեմբերի 10-ին հայտնի դարձավ, որ Տավուշի մարզում գտնվող Խորանաշատ վանքն ընդգրկվել է 2020-ի եվրոպական մշակութային ժառանգության «7 ամենավտանգված հուշարձան» ծրագրի հավակնորդների նախնական ցանկում:
Եվրոպայի ամենավտանգված ժառանգության վերջնական յոթնյակը կհրապարակվի 2020-ի մարտին:
Խորանաշատը ներկայացվել էր Հայաստանի կրթության, գիտության, մշակույթի եւ սպորտի նախարարության կողմից՝ շվեյցարական Il Germoglio հիմնադրամի եւ վերջինիս նախագահ Թերեզա Մխիթարյանի նախաձեռնությամբ:
Լուսանկարը` Անդրանիկ Քեշիշյան
Մեդիամաքսը ներկայացնում է ֆոտոշարք Խորանաշատի մասին, որի հեղինակը Անդրանիկ Քեշիշյանն է:
Խորանաշատը գտնվում է Չինարի գյուղից հյուսիս-արեւելք:
Լուսանկարը` Անդրանիկ Քեշիշյան
Վանքը հիմնել է Վանական Վարդապետը Վահրամյան իշխանների աջակցությամբ XIII դարի առաջին կեսին:
Վանքային համալիրի կազմի մեջ են մտնում Սուրբ Աստվածածին եւ Սուրբ Կիրակի եկեղեցիները, կիսավեր մատուռը, վանական խցերը եւ երկու գերեզմանոցները:
Լուսանկարը` Անդրանիկ Քեշիշյան
Համալիրը շրջապատված էր պարսպապատերով, որն այժմ կիսավեր է:
Վանքի գլխավոր կառույցը, Սուրբ Աստվածածին եկեղեցին, կառուցվել է 1211-1222 թթ.: Եկեղեցու անսովոր լայն կիսաշրջան ավագ խորանը մասնատված է 14 խորշերով:
Լուսանկարը` Անդրանիկ Քեշիշյան
XIII դարի Սուրբ Կիրակի փոքր գմբեթավոր եկեղեցու արեւելյան կողմում մատուռի ավերակներն են, միջնադարյան գերեզմանը, որտեղ գտնվում է քանդակազարդ թեւավոր խոշոր խաչքարը: Ենթադրվում է, որ այն վանքի հիմնադիր Վանական Վարդապետի գերեզմանաքարն է:
Լուսանկարը` Անդրանիկ Քեշիշյան
Խորանաշատը միջնադարյան Հայաստանի ամենախոշոր կրթական, գիտամշակութային ու աստվածաբանական կենտրոններից մեկն էր:
Խորանաշատի վարդապետարանը եղել է պատմագրական թեքում ունեցող դպրոց, որտեղ ուսանել են 7-8 տարի։ Դասավանդել են պատմություն, աստվածաբանություն, իմաստասիրություն, մատենագիտություն, երաժշտագիտություն, քերականագիտություն, աստղաբաշխություն, տոմարագիտություն, բնագիտություն, բուսագիտություն, նաեւ ընդօրինակել ձեռագրեր։
Լուսանկարը` Անդրանիկ Քեշիշյան
Այստեղ ուսանել են հանրաճանաչ փիլիսոփա Վարդան Արեւելցին, պատմաբան Գրիգոր Ակներցին, կաթողիկոս Գրիգոր Ախթամարցին:
Լուսանկարը` Անդրանիկ Քեշիշյան
Խորանաշատը եղել է նաեւ գրչության կենտրոն: Այստեղ գրված անգին ձեռագրերից շատերը պահվում են Մատենադարանում, այդ թվում «Մատյան ողբերգության», «Նարեկ», «Մաշտոց» ձեռագրերը: Վանքում ստեղծվել է նաեւ Ավետարանի ձեռագիրը, որն ենթադրաբար գրվել է հնադարյան Արցախում, Ուտիքում:
Խորանաշատ վանքը գտնվում է տարածքում, որը հաճախակի է գնդակոծության ենթարկվում Ադրբեջանի կողմից:
Հրապարակման մեջ օգտագործվել են Հայ Առաքելական եկեղեցու Տավուշի թեմի նյութերը
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: