Creative Armenia մշակութային հիմնադրամի Artbox ստեղծարար ինկուբատորը սկսել է աշխատանքը:

Artbox-ի նպատակն է աջակցել արվեստի ոլորտի՝ պոտենցիալ շահութաբերություն ունեցող նախագծերին, որոնք կարող են հետաքրքրել ներդրողներին: Այլ կերպ ասած՝ արվեստագետներին սովորեցնել ոչ միայն ստեղծել, այլեւ ճիշտ փաթեթավորել ու վաճառել իրենց արվեստը:

Ստեղծարար ինկուբատորը մշակվել է ԵՄ-ն բիզնեսի համար նախաձեռնության «Նորարարական տուրիզմի եւ տեխնոլոգիաների զարգացում Հայաստանի համար» (ITTD ) ծրագրի աջակցությամբ, որը համաֆինանսավորվում է Եվրոպական Միության ու Գերմանիայի Դաշնային Հանրապետության տնտեսական համագործակցության եւ զարգացման նախարարության կողմից, իրականացվում Գերմանիայի միջազգային համագործակցության ընկերության (GIZ) կողմից:

«Artbox-ը մեկնարկում ենք մեծ սպասումով եւ շնորհակալ ենք ինչպես դրա իրականացմանն աջակցողներին, այնպես էլ մեր արվեստագետներին, առանց որոնց ոչինչ չէր լինի», - մեկնարկն ազդարարող առցանց միջոցառմանն ասել է Creative Armenia մշակութային հիմնադրամի ծրագրերի տնօրեն Անուշ Տեր-Խաչատրյանը:

Նրա խոսքով՝ առաջին Artbox-ի համար ընտրվել են 29 արվեստագետներ՝ երաժշտության, նորաձեւության, զբոսաշրջության ու այլ ոլորտների նախագծերով:

Անուշ Տեր-Խաչատրյանը

Լուսանկարը` Մեդիամաքս

«Սա մասնակիցների համար իրենց գաղափարներն առաջ մղելու լավ հնարավորություն է ու շատ ուրախ ենք աջակցել այդ հնարավորությանը», - ասել է Հայաստանում ԵՄ պատվիրակության համագործության բաժնի պետ Ֆրանկ Հեսսը:

«Հայաստանը կրեատիվ արդյունաբերության ոլորտում մեծ ներուժ ունի: Հայերի հնարամտությունն ու ստեղծարարությունն անսպառ է, բայց միաժամանակ սա շատ մրցակցային ոլորտ է աշխարհում: Այնպես որ ներկայացվող գաղափարներն ու բիզնեսները պետք է մրցունակ լինեն: Արվեստագետի համար այդ մրցունակությունն ինքնուրույն ապահովելը, երբեմն, բավական դժվար է: Այս ծրագրի նպատակն է նշված հարցում աջակցել արվեստագետին եւ նպաստել ֆինանսապես կայուն արվեստի բնագավառի զարգացմանը Հայաստանում», - ասել է Ֆրանկ Հեսսը:

Նա կարեւորել է այն փաստը, որ ընտրված 29 արվեստագետների թվում շատ են կանայք. «Կանանց տնտեսական հզորացումն այն առաջնահերթություններից է, որոնց ուզում ենք աջակցել»:

«Creative Armenia հիմնադրամի մեր գործընկերների հետ այսօր սկսում ենք մեծ ճամփորդություն, որի հիմնական նպատակը կենսունակ արվեստի բնագավառի զարգացումն է Հայաստանում: Համոզված ենք՝ այս ծրագիրը կնպաստի նաեւ զբոսաշրջության կայուն զարգացմանը», - ասել է EU4Bussines «Նորարարական տուրիզմի եւ տեխնոլոգիաների զարգացում Հայաստանի համար» (ITTD) ծրագրի ղեկավար Վիլհելմ Հուգոն:

Վիլհելմ Հուգոն

Լուսանկարը` Creative Armenia

Նա նշել է՝ կրեատիվ գաղափարներից բացի, շատ կարեւոր է զարգացնել նաեւ բիզնես հմտությունները.

«Հաջողության գրավականը հենց դա է: Այս ընթացքում ձեզ կուղեկցեն, իրենց փորձով կկիսվեն համաշխարհային մասշտաբի մասնագետներ: Հուսով եմ՝ հմտությունները, որ ձեռք կբերեք, կնպաստեն ձեր նախագծերի առաջխաղացմանը»:

Լուսանկարը` Creative Armenia

Creative Armenia հիմնադրամի հիմնադիր տնօրեն Կարին Հովհաննիսյանը շնորհակալություն է հայտնել գործընկերներին համապարփակ աջակցության համար:

«Artbox-ը ծրագիր է, որը մեկնարկել է արվեստագետների ջանքերով՝ ձեր պես արվեստագետների, որոնք փորձում են մշակութային ենթակառուցվածք ստեղծել: Բոլորս հասկանում ենք արվեստի, մուսայի կարեւորությունը, դրա հետ ստեղծվող կապը, որը շատ անձնական է, բայց, ցավոք, այսօր գաղափարի նորարար ու կրեատիվ լինելը բավարար չէ: Պետք է կարողանալ ճիշտ փաթեթավորել այն, մրցունակ դարձնել ու վաճառել: Մեր այս ինկուբատորը, արվեստի տուփիկը՝ Artbox-ը, հենց այդ նպատակն ունի», - ասել է Կարին Հովհաննիսյանը:

Կարին Հովհաննիսյանը

Լուսանկարը` Creative Armenia

Նա նշել է՝ Artbox-ը պարզապես ծրագիր չէ, մշակութային ենթակառուցվածք է.

«Սա մշակութային շարժիչ է: Հուսով ենք՝ այն կծառայի ոչ միայն Հայաստանին, այլեւ կստեղծի պարադիգմա այս տարածաշրջանում ու, ինչո՞ւ ոչ՝ աշխարհում»:

Artbox ստեղծարար ինկուբատորի աշխատանքները մեկնարկել են մշակութային բիզնեսի ու կրեատիվ արդյունաբերության ոլորտում 30 տարվա աշխատանքային փորձ ունեցող մենտոր Դեյվիդ Փերիշի աշխատաժողովով.  

Լուսանկարը` Creative Armenia

«Անհամբերությամբ սպասում եմ մեր համատեղ աշխատանքին: Միասին պետք է հասկանանք՝ ինչպես համատեղել բիզնեսն արվեստի հետ՝ ձեւավորելով բիզնեսի արվեստ ու արվեստի բիզնես», - ասել է Դեյվիդ Փերիշը:

Artbox ստեղծարար ինկուբատորի աշխատանքներն ընտրված նախագծերի վրա տեւելու են 12 շաբաթ, որից հետո դրանք ներկայացվելու են ներդրողներին:

Յանա Շախրամանյան