«Քառյակ մեդիան», որի կազմի մեջ մտնում ArmNews հեռուստանընկերությունը, Tert.am-ը եւ ArmNews FM ռադիոկայանը, դադարեցնում է գործունեությունը։

Այդ մասին այսօր հայտնել է «Քառյակ մեդիա»-ի համահիմնադիր Սամվել Ֆարմանյանը։

Ստորեւ նեկայացնում ենք «Քառյակ մեդիա»-ի հիմնադիրների հայտարարությունը․

«Երկար ժամանակ մենք կանգնած էինք ծանր որոշման առաջ՝ ինչպես շարունակել մեր գործունեությունը։ Այս ընթացքում ստացել ենք գործակցության բազմաթիվ քաղաքական առաջարկներ ու մերժել, քանի որ դրանք տարբերվել են մեր սկզբունքներից։

Մենք քննարկել ենք նաեւ վաճառքի մի քանի առաջարկներ, բայց չի հաջողվել գտնել այնպիսիք, որոնք թույլ կտային պահպանել որդեգրած քաղաքականությունն ու հավատարիմ մնալ անցած ճանապարհին: Այդ պատճառով կայացրել ենք մեզ համար ցավալի, բայցեւ ամենաբնական որոշումը. «Քառյակ մեդիան» դադարեցնում է գործունեությունը։

Վերջին 3.5 տարիներին թիմն արել է ուժերի ներածին չափով առավելագույնը՝ կանխատեսելով, պատմելով, բացատրելով, բացահայտելով եւ զգուշացնելով առկա եւ սպասվելիք իրողությունների մասին. վեր են հանվել խնդիրներն ու ներկայացվել փաստերը՝ քաղաքական, հասարակական եւ պատերազմական գործընթացների ամենաթեժ կետերից: Թե որքան պրոֆեսիոնալ, նվիրումով եւ անձնուրաց ենք աշխատել, թողնում ենք հանրության դատին:

Հայաստանում իրականությունը եւ սկզբունքներն այլեւս, ցավոք, երկրորդական են դարձել. առաջնային են երեւույթներ, որոնք աղերս չունեն մեր հավատամքի եւ էության հետ։ Իսկ մեդիան, որպես փաստերի հայթայթման եւ լուսաբանման հարթակ, իրեն էապես սպառել է, որովհետեւ այլեւս չկան չպարզաբանված փաստեր ու էական հանգամանքներ. բոլորը բոլորի մասին ամեն ինչ գիտեն:

Համընդհանուր չեզոքությունը, հանրային ապատիան, քաղաքական դերակատարների անհիմն պասիվությունը, քաղաքական պայքարի ինքնանպատակ լինելը մեզ չեն թողնում այլ ընտրություն։

Մենք չենք հեռանում, բայց առկա եւ առաջարկվող օրակարգերը մերը չեն. առնվազն այս ձեւաչափով ու գործիքակազմով աշխատելը ճիշտ չէ առաջին հերթին ինքներս մեզ համար, ուստի, մեր որոշումը թեեւ չափազանց ցավոտ, բայց ազնիվ է»։