«Ադրբեջան՝ կրակի երկիր» (Azerbaijan Land of fire) կարգախոսն այսուհետ կաշխատի ոչ թե հօգուտ, այլ ընդդեմ Ադրբեջանի։
Ադրբեջանի պաշտոնական կարգախոսը տարբեր միջոցառումների ժամանակ եւ արշավներում օգտագործվում է երկիրը գովազդելու համար: Տարիներ առաջ հենց այդ կարգախոսով էր Ադրբեջանը հովանավորում Մադրիդի «Ատլետիկո» ֆուտբոլային ակումբը, որը հայ ֆուտբոլասերներից շատերը սկսեցին «Մադրիդի Նեֆթչի» անվանել:
Լուսանկարը` REUTERS
Իսկ հիմա հայկական Zuck Independent Agency-ն կարգախոսը դարձրել է «փամփուշտ» քարոզչական պատերազմում, որն ընթանում է սեպտեմբերի 27-ից սկսած՝ Արցախի վրա Ադրբեջանական ագրեսիայի մեկնարկին զուգահեռ։
«Մեդիադաշտում պատերազմական ճակատ է բացվել եւ փորձում ենք այդտեղ մատակարարումներ անել, իսկ թիրախը միջազգային լսարանն»,- Մեդիամաքսին ասել է Zuck Independent Agency-ի համահիմնադիր եւ ստեղծագործական տնօրեն Աշոտ Հովակիմյանը։
Նա ասել է, որ քարոզչական մեդիաբովանդակություն ստեղծելիս հիշել են, որ Ադրբեջանն ուներ այդպիսի պաշտոնական կարգախոս եւ որոշել «հարվածը» հենց այդտեղ հասցնել։
Լուսանկարը` Zuck Independent Agency
«Իրենց կարգախոսն աշխատում է իրենց դեմ։ Արշավում օգտագործված նկարները ադրբեջանական մեդիաներից են վերցված եւ արված են այս օրերին։ Դրանցում պատկերված բոլոր զինատեսակներն ադրբեջանական են եւ այդ զինատեսակների կրակն ուղղված է Արցախին»,- ասել է Աշոտ Հովակիմյանը։
Zuck Independent Agency-ի թիմը միջազգային լսարանին ուղղված երեք հիմնական շեշտադրում է առանձնացրել։
Լուսանկարը` Zuck Independent Agency
Պատկերներից մեկը «խոսում է» այն մասին, որ սեպտեմբերի 27-ին Ադրբեջանը լայնածավալ հարձակում է սկսել Արցախի դեմ։
Լուսանկարը` Zuck Independent Agency
Երկրորդում «ՏՕՍ-1Ա» ծանր հրանետային համակարգն է պատկերված, այս պատկերը պատմում է այն մասին, որ Ադրբեջանն առաջինն է կիրառել ռազմական ծանր տեխնիկա։ Թուրքիայի կողմից Ադրբեջանին ցուցաբերվող օգնության մասին շեշտադրմամբ է երրորդ պատկերը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: