Երեւան: Մեդիամաքս: ՀՀ արտակարգ իրավիճակների փոխնախարար Էնրիկո Ապրիամովն այսօր մասնակցել է Հայ-ռուսական մարդասիրական արձագանքման կենտրոնում ռուսական փրկարարական գույքի հերթական խմբաքանակի հանձնման արարողությանը:

ԱԻՆ-ում նշել են, որ այս խմբաքանակը ներառում է 2 միավոր «Կամազ» մակնիշի  ամենագնաց հրշեջ-փրկարարական մեքենա եւ 161 միավոր փրկարարական վրան:

«Կամազ» մակնիշի մեքենաներն ունեն 9 տոննա տարողությամբ ջրային բակ, զինված են հատուկ փրկարարական գույքով եւ նախատեսված են մասնավորապես օդակայաններում փրկարարական ու հրդեհաշիջման աշխատանքներ կատարելու համար: Մոտ ապագայում կենտրոնը կհամալրվի այս մեքենաների ավելի կատարելագործված մակնիշներով:

Ստացված 161 միավոր փրկարարական վրաններից 110-ը նախատեսված են 10, իսկ 51-ը՝ մինչեւ 30 մարդ տեղավորելու համար:

Հայաստանի եւ Ռուսաստանի միջեւ պայմանավորվածության համաձայն՝ 2017թ. կենտրոնին տրամադրվելու է շուրջ $ 16 մլն-ին համարժեք աջակցություն, որը ներառում է փրկարարական գույք եւ սարքավորումներ: