Մեդիամաքսը շարունակում է պատմել, թե ինչով կարելի է զբաղվել հանգստյան օրերին Երեւանում եւ մայրաքաղաքից դուրս:
18 ՆՈՅԵՄԲԵՐԻ, ՇԱԲԱԹ
Ժամը 12:00-ին «Ինդիգո» մանկական զարգացման կենտրոնում կայանալու է ինտերակտիվ «հանդիպում» Մարտիրոս Սարյանի արվեստի հետ: Երեխաները կվերարտադրեն նկարչի ամենահայտնի կտավներից մեկը, կվերլուծեն իրենց աշխատանքը եւ կբացահայտեն նկարչական գաղտնիքներից մի քանիսը:
Դասընթացին մասնակցելու համար անհրաժեշտ է նախապես գրանցվել, զանգահարելով 011 97 79 77 հեռախոսահամարով: Մասնակցության արժեքը՝ 2000 դրամ:
***
Ավելի փոքր բալիկներին եւս հետաքրքիր հանդիպում է սպասում՝ Մկների կղզու ամենահայտնի հրատարակիչ Ջերոնիմո Ստիլտոնի, նրա օգնական Պինկի Պիկի եւ «Իմ անունն է Ստիլտոն, Ջերոնիմո Ստիլտոն» վրիպակի մնացած հերոսների հետ:
Միջոցառման կազմակերպիչներն են Երազ մանկական կենտրոնը (Ազատության 23/7) եւ «Զանգակ» հրատարակչությունը: Սկիզբը ժամը 19:00-ին է, մուտքն ազատ է:
***
Նոյեմբերի 18-ից «Իլիկ» սրճարանում (Մաշտոցի 25) մեկնարկում է վարպետության դասերի շարք բոլոր այն մարդկանց համար, որոնք, օրինակ, մեծ հաճույքով կատարում են իրենց երեխաների Տեխնոլոգիա առարկայի առաջադրանքները:
Խոսքը գունավոր թղթերով ստեղծագործելու մասին է: Առաջին դասին մասնակիցները ընտրելու է իրենց թեմաները եւ ճարտարապետ-նկարիչ Արմեն Հակոբյանի հետ փորձելու են գտնել այն վերարտադրելու լուծումները: Ցանկալի է, որ մասնակիցները գան իրենց մատիտներով, քանոններով, մկրատներով եւ գունավոր թղթերով:
Մեկ դասի արժեքը կազմում է 2000 դրամ: Վարպետության դասերին կարող եք ներկա գտնվել յուրաքանչյուր շաբաթ օր՝ ժամը 12:00-ին:
***
Ժամը 18:00-ին «Բուկինիստ» գրախանութների ցանցի «Մետրոնոմ» մասնաճյուղում գրքասեր հասարակությանը կներկայացվի Անտուան դը Սենտ Էկզյուպերիի «Մարդկանց երկիր» գիրքը՝ Շուշանիկ Թամրազյանի թարգմանությամբ:
Շնորհանդեսին «Մարդկանց երկիրը» կարող եք ձեռք բերել հատուկ գնով։ Մուտքն ազատ է։
***
Իսկ LOFT-ում ժամը 18:00-ին կսկսվի Ֆրիդա Կալոյին նվիրված երեկոն։ Սկզբում արվեստի քննադատ Աննա Գալստյանը կկարդա «Ֆրիդայի դրախտի ճանապարհը» դասախոսությունը, իսկ 19:00-ից սպասվում են հետեւյալ իրադարձությունները.
- Պերֆորմանս՝ պոետ Հասմիկ Սիմոնյան
- Երաժշտական կատարումներ՝ Վիգեն Հովսեփյան
- «Frida» հագուստի հավաքածուի ցուցադրություն՝ մոդելավորող Սվետա Մկրտչյան
- Գեղանկարչական ցուցադրություն-պերֆորմանս՝ Թերլեմեզյանի անվան գեղարվեստի պետական քոլեջ
- Պարային պերֆորմանս՝ La Vida de Tango Argentino
- Թեմատիկ ֆոտոանկյուն՝ «Մարաշլյան» ֆոտո-ատելիե
- Մեքսիկական խոհանոցի եւ խմիչքի հյուրասիրություն
- Frida by Julie Taymor Ֆիլմի ցուցադրություն
Մուտքի արժեքը՝ 2500 դրամ։ Միջոցառումը նախատեսված է 18+ անձանց համար։ Հարկավոր է նախապես գրանցվել այստեղ:
***
ԷՕՆ-ում ժամը 19:00-ին հավաքվելու են հին ու բարի լոտո խաղալու նպատակով։ Մուտքի արժեքը՝ 1500 դրամ։ Գրանցվել կարող եք այստեղ:
***
Կամերային երաժշտության տանը շատ «հավես» համերգ է լինելու։ «Արտ Սինեմա» մենակատարների անսամբլը կկատարի «Երաժշտություն սիրված ռեժիսորների կինոնկարներից»։
Խմբի կազմում են՝
Աշոտ Խոյեցյան. առաջին ջութակ
Հայկ Վարդանյան. երկրորդ ջութակ
Լեւոն Առաքելյան. թավջութակ
Կարեն Սարաֆյան. դաշնամուր
Սկիզբը՝ 19:00-ին:
Տոմսերի արժեքը՝ 1000-ից 3000 դրամ։
***
Ժամը 19:00-ին Դրամատիկական թատրոնում կարող եք նոր ներկայացում դիտել։ Բեմում կլինեն «Խելահեղ օր կամ Ֆիգարոյի ամուսնությունը» կատակերգության հերոսները, որոնց մարմնավորել է թատրոնի երիտասարդական կազմը։
Բեմադրությունը՝ Գրիգոր Խաչատրյանի։
Դերերում՝ Գագիկ Մկրտչյան, Լիդիա Գրիգորյան, Նարինե Պետրոսյան եւ այլոք։
Տոմսերի արժեքը՝1000-ից 2500 դրամ։
***
Շաբաթ օրը գաստրոնոմիայի երկպագուները եւս զբաղմունք կունենան։ Ժամը 19:00-ին Picasso ռեստորանում (Կողբացի 30/26) գառան մսին նվիրված վարպետության դաս է անցկացվելու, որի ընթացքում գլխավոր խոհարար Արթուր Եսայանը ցուցադրելու է այն պատրաստելու եւ մատուցելու տարբերակները:
Սեղան ամրագրելու եւ պայմաններին ծանոթանալու համար զանգահարեք (010) 53 22 33։
***
Ժամը 20:00-ին գայթակղիչ համադրության երեկո կմեկնարկի «Մի Մորենա» ակումբում (Տերյան 105/1)՝ թեժ պարեր կուբացի պարուսուց Քրիստիանի հետ եւ խեցգետիններ՝ անսահմանափակ քանակությամբ։ Մուտքն անվճար է, սակայն խեցգետինների կախարդական ափսեին տիրանալը կարժենա 2000 դրամ։
19 ՆՈՅԵՄԲԵՐԻ, ԿԻՐԱԿԻ
Կիրակի կեսօրին LOFT-ում հանդիպելու են Lego սիրող ընտանիքները (6+ տարեկան երեխաներով)՝ տարբեր թեմատիկ կոնստրուկտորներ հավաքելու նպատակով:
10+ տարիքի երեխաները կարող են զբաղվել այդ գործով ինքնուրույն: Թե՛ մեծերի, թե՛ փոքրերի համար սա լավ առիթ է ստեղծագործելու, բացահայտումներ անելու եւ, ինչու չէ, մտքի թռիչքը զարգացնելու համար:
Գրանցվել կարելի է այս հղումով:
Մասնակցության արժեքը մեկ անձի համար կազմում է 2000 դրամ:
***
Տիկնիկային թատրոնում ժամը 12:00-ին, 14:00-ին,16:00-ին բեմում կլինեն «Շունն ու կատուն»: Հակամարտող կողմերը մեկ անգամ եւս կհիշեցնեն, թե որտեղ են իրենց փոխադարձ հակակրանքի ակունքները: Տոմսերի արժեքը՝ 600-1200 դրամ:
***
Ժամը 14:00-ին Smash Studio-ում (Այգեստան 9-89) կարող եք սեփական դիզայնով շապիկ կամ բլուզ պատրաստել: Անհրաժեշտ ներկերը կտրամադրվեն ստուդիայի կողմից:
Մասնակցության արժեքը՝ 3500 դրամ:
Գրանցվելու համար զանգահարեք 00 55 86 87 91:
***
Չմոռանալով քաղաքից դուրս գնալու մեր մշտական խորհրդի մասին, այս անգամ առանձնացրել ենք Աշտարակի «Այրուձի» հեծյալ ակումբում կայանալիք ձիավարությունը: Ձեզ կծանոթացնեն ձիավարության կանոններին, կպատմեն ուշագրավ պատմություններ ձիերի մասին, իսկ օրը կեզրափակվի խարույկի շուրջ:
Մասնակցության վճարը կազմում է՝ 5000 դրամ: Նախնական գրանցումը պարտադիր է: Մանրամասն տեղեկություններ ստանալու համար զանգահարեք 094 362131, 041 362131 կամ 091 362131:
***
19:00-ից սկսած MacGuffin Art House սրճարանում (Փարպեցի 16) կենդանի կատարմամբ ռուսական ռոքի լավագույն երգերն են հնչելու: Շատերը կհամաձայնեն, որ աշնան վերջը տրամադրում է ռուսական ռոք լսել (մեկ-մեկ էլ՝ երգել):
***
Իսկ ժամը 21:30-ին Mezzo ակումբում բոլորովին այլ տրամադրություն է տիրելու՝ նվագելու են շեփորահար Chigapo-ն եւ The Untouchables բենդը:
Ինչպես նշված է երաժիշտների ֆեյսբուքյան էջում՝ «Մենք զվարճալի ենք, սիրում ենք ամբոխը եւ երաժշտությունը, ուրախանալ ձեզ հետ միասին եւ նվագել ամեն ինչ»:
Ակումբում գտնվելով կարող եք ոչ միայն ջազ լսել, այլեւ... «ըմպել» այն:
Վերջին մի քանի շաբաթների ընթացքում Երեւանում տիրող ջազային տրամադրությանը նոր երանգներ հաղորդելու նպատակով Երեւանի կոնյակի գործարանը Mezzo-ում առաջարկում է ARARAT Jazz Connection կոկտեյլը, որը պատրաստվում է լեգենդար կոնյակով, կիտրոնի հյութով ու սպիտակ դեղձով:
Աննա Բուբուշյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: