Երեւան: Մեդիամաքս: Հոկտեմբերի 25-ին՝ ժամը 15:00-ին, ՀՀ Գիտությունների ազգային ակադեմիայի նիստերի դահլիճում ելույթ կունենա անվանի գիտնական, Սկոլկովոյի գիտության եւ տեխնոլոգիաների ինստիտուտի պրոֆեսոր Արտեմ Օհանովը:

Նա կներկայացնի «Նոր նյութերի կանխատեսում՝ արհեստական բանականությունից դեպի մենդելեեւյան թվերի հայեցակարգ» թեմայով զեկուցում, հայտնում են Գիտությունների ազգային ակադեմիայից:

Արտեմ Օհանովը կներկայացնի Մենդելեեւի պարբերական աղյուսակի նոր բարելավված տարբերակը, այսպես կոչված մենդելեեւյան թվերը, որն արդեն հրապարակվել է առաջատար գիտական ամսագրերում։ Դա հեղափոխական փորձ է՝ Մենդելեեւի պարբերական երկչափ աղյուսակը վերափոխել այնպես, որ հարակից տարրերը հնարավորինս նման լինեն միմյանց: Այսպիսի վերափոխման արդյունքում ավելի հարմար է կանխատեսել տարրերի եւ դրանց միացությունների կարծրությունը, կայունությունը, մագնիսացումը եւ այլ հատկությունները:

Արտեմ Օհանովը հայտնի է նոր նյութերի համակարգչային դիզայնի եւ բյուրեղային կառուցվածքների կանխատեսման մեթոդների ստեղծման, ինչպես նաեւ բարձր ճնշումների քիմիայի եւ մոլորակի ընդերքի նյութի ուսումնասիրություններով:

Արտեմ Օհանովը Ռուսաստանի գիտությունների ակադեմիայի պրոֆեսոր է, Մոսկվայի ազգային հետազոտական տեխնոլոգիական համալսարանի պրոֆեսոր, Եվրոպայի ակադեմիայի իսկական անդամ, Քիմիայի Թագավորական ընկերության իսկական անդամ, Ամերիկյան ֆիզիկական ընկերությունների իսկական անդամ: 2008-2017 թթ-ին նա եղել է Նյու Յորքի Սթոուն Բրուքի համալսարանի Նյութերի համակարգչային դիզայնի լաբորատորիայի ղեկավար։