Երեւան: Մեդիամաքս: Թուրքիայի իշխանությունները մտադիր են երկրի տնտեսությունը ընդգրկել աշխարհի խոշորագույն տնտեսությունների տասնյակում:
Ինչպես հայտնում է Անադոլու գործակալությունը, Թուրքիայի նախագահ Ռեջեփ Թայիփ Էրդողանը այդ մասին ասել է իշխող «Արդարություն եւ զարգացում» կուսակցության անդամների հետ հանդիպմանը։
«Հուսով եմ, որ մենք առավելագույնս կօգտվենք մեր ունեցած բոլոր հնարավորություններից եւ կկատարենք մեր երկրի տնտեսությունը աշխարհի տասը խոշորագույն տնտեսություններից մեկը դարձնելու խոստումը», - ասել է Թուրքիայի ղեկավարը։
Նա մատնանշել է կյանքի թանկացումը եւ գնաճի բացասական ազդեցությունը բնակչության բարեկեցության վրա կանխելու անհրաժեշտությունը։
«Չնայած նրան, որ մենք այժմ բախվում ենք տարածաշրջանային ճգնաժամերի, ինչպիսին է Ուկրաինայի պատերազմը, մենք չենք անտեսում այն խնդիրները, որոնք ազդում են մեր քաղաքացիների առօրյա կյանքի վրա»,- ասել է Թուրքիայի նախագահը։
Էրդողանը վստահություն է հայտնել, որ Թուրքիայի զարգացմանը խոչընդոտելու բոլոր փորձերը կշարունակեն ձախողվել։
«Մեր երկրում քաոս առաջացնելու, այն ապակայունացնելու եւ մեր անվտանգությունը թուլացնելու անվերջ փորձեր էին արվում։ Բարեբախտաբար, մենք հաղթահարել ենք այս բոլոր թակարդներն ու հարձակումները»,- ասել է նա։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: