Երեւան: Մեդիամաքս: ՀՀ վարչապետին առընթեր Ընտրական օրենսդրության բարեփոխումների հանձնաժողովը հանրության դատին է ներկայացրել Քրեական, Քրեական դատավարության եւ Վարչական իրավախախտումների վերաբերյալ օրենսգրքի փոփոխությունների փաթեթը:

Նախագծով նախատեսված փոփոխություններն ուղղված են ընտրական տեղամասերում կարգուկանոնի, օրինականության մթնոլորտի ձեւավորմանը: 

Կառավարության մամուլի ծառայության փոխանցմամբ՝ հանձնաժողովը օգոստոսի 23-ին՝ ժամը 16:00-ին, կառավարության նիստերի դահլիճում կազմակերպում է այդ փաթեթի հանրային քննարկում:

Քննարկմանը կարող են մասնակցել կուսակցությունների ու դիտորդական առաքելություն իրականացնող հասարակական կազմակերպությունների ներկայացուցիչներն ու ընտրական իրավունքի պաշտպանությամբ զբաղվող փաստաբանները:

Մասնակցության համար անհրաժեշտ է գրանցվել նախապես՝ 055 468737 հեռախոսահամարով կամ kristina.poghosyan@gov.am հասցեով։