Երեւան: Մեդիամաքս: ՀՀ Ազգային անվտանգության խորհրդի քարտուղար Արմեն Գրիգորյանը կարծում է, որ «ինքնիշխան եւ բարգավաճող Հայաստանը նշանակում է ուժեղ Ռուսաստան եւ հակառակը»:
«Գլոբալ շահերի տեսանկյունից հայկական պետության նոր ղեկավարությունը հավատարիմ է ոչ միայն Ռուսաստանի հետ ռազմավարական հարաբերությունների պահպանման գծին, այլ նաեւ այդ կապերին նոր քաղաքական, տնտեսական, սոցիալական եւ մշակութային ազդակներ հաղորդելուն: Ես համոզված եմ, որ մեր երկու կողմերի միջեւ հարաբերություններն ունեն հսկայական ներուժ, որը մենք պարտավոր ենք օգտագործել ի շահ մեր երկրների եւ ժողովուրդների»,- գրում է Արմեն Գրիգորյանը Gazeta.ru կայքում հրապարակված հոդվածում:
Միաժամանակ, նկատել է նա, «աշխարհում դժվար է գտնել ռազմավարական դաշինքներ առանց խնդիրների, սխալների եւ թյուրըմբռնման»:
«Հայ հասարակությունը շատ ցավոտ է ընդունում այն փաստը, որ ՀԱՊԿ-ի եւ ԵԱՏՄ-ի շրջանակներում Հայաստանի գործընկերները եւ դաշնակիցները չեն մշակել առավել զգայուն հարցերի շուրջ միասնական ռազմավարական դիրքորոշում: Անթույլատրելի է, որպեսզի մենք եւ կառույցի անդամ մեր գործընկերները անտեսենք այլ երկրների կողմից հնչող տարածքային պահանջները, չէ որ նման հռետորաբանությունը նաեւ կարող է ընկալվել որպես ագրեսիայի գործողություն: Սակայն ես հավատում եմ, որ քաղաքականության մեջ պրագմատիզմը եւ բարոյականությունը պետք է փոխկապակցված լինեն եւ լրացնեն միմյանց: Մի՞թե ռազմավարական դաշինքը չի նշանակում ավելացված քաղաքական արժեքի առկայություն՝ միմյանց համար հատուկ կարգավիճակի փոխադարձ ճանաչման տեսքով: Անկասկած, մեր հարաբերությունները պետք է ունենան բարոյական սկիզբ, հատկապես քաղաքական հարթության մեջ»,- ասել է Արմեն Գրիգորյանը:
«Մենք պետք է ընդունենք, որ ժողովուրդները չեն մտածում սառը, հաշվարկային հասկացություններով: Նրանք ապավինում են բարոյականությունը եւ արդարությանը: Հայ ժողովուրդը տեսնում է տվյալ իրավիճակում միայն մի պատկեր՝ դաշնակիցները տալիս են մեր հակառակորդին գործիք, որն օգտագործվում է բացառապես ագրեսիվ նպատակներով: Իհարկե, մենք պետք է քննարկենք այդ հարցն ամենաբարձր մակարդակով եւ գտնենք լուծումներ, որոնք բխում են մեր երկրների շահերից: Այդ լուծումների հայեցակարգը բավականին պարզ է. ինքնիշխան եւ բարգավաճող Հայաստանը նշանակում է ուժեղ Ռուսաստան եւ հակառակը», - ընդգծել է ՀՀ Անվտանգության խորհրդի քարտուղար:
«Բազմաբեւեռ քաղաքականությունը, իհարկե, ժամանակի հրամայականն ու ոգին է: Դա ամենեւին չի նշանակում, որ այն ունի «հակա» նախածանցը: Անցնելով հազարամյա փորձությունների եւ արգելքների միջով, Հայաստանը եւ հայ ժողովուրդը չեն կարող թույլ տալ իրեն լինել հակառուսական, հակաեվրոպական, հակաիրանական կամ հակաամերիկյան: Մենք մշտապես եղել ենք «եւ-եւ» բանաձեւի կողմնակիցը, ինչը գործնականում կիրառվեց, երբ Հայաստանը, լինելով ԵԱՏՄ անդամ, ստորագրեց քաղաքական համաձայնագիր ԵՄ-ի հետ: Այդ ուղղվածության շրջանակներում հայ-ռուսական հարաբերություններին մեծ ապագա է սպասվում, քանի որ մենք մյուսներից շատ ենք շահագրգռված խաղաղության եւ կայունության ապահովման մեջ մի տարածաշրջանում, որտեղ Ռուսաստանի աշխարհաքաղաքական դերը դժվար է գերագնահատել»,- ամփոփել է Արմեն Գրիգորյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: