2001 թվականի մարտի 17-ին ԵԱՀԿ Մինսկի խմբի ամերիկացի համանախագահ Քերի Քավանոն չէր բացառել, որ Հայաստանի եւ Ադրբեջանի նախագահների` ապրիլի 3-ին Ֆլորիդայում կայանալիք հանդիպումը կարող է «որոշիչ» դառնալ: Միեւյնույն ժամանակ, դիվանագետը զերծ էր մնացել Ռոբերտ Քոչարյանի եւ Հեյդար Ալիեւի հանդիպման արդյունքները կանխատեսելուց: «Հրաշալի կլիներ, եթե այդ հանդիպումը վերջինը դառնար: Սակայն պետք է հաշվի առնել, որ խաղաղությանը հասնելն իրոք հեշտ չէ», - ասում էր Քավանոն:
Մի քանի օր անց, 2001 թվականի մարտի 20-ին եւ 21-ին, Վաշինգտոնում կայացան Հայաստանի արտաքին գործերի նածարար Վարդան Օսկանյանի հանդիպումները ԱՄՆ նախագահի ազգային անվտանգության հարցերով խորհրդական Քոնդոլիզա Ռայսի եւ ԱՄՆ պետքարտուղար Քոլին Փաուէլի հետ:
Մարտի 21-ին ԱՄՆ Պետդեպարտամենտի պաշտոնական ներկայացուցիչ Ռիչարդ Բաուչերն ասաց, որ Հայաստանի եւ Ադրբեջանի նախագահների հանդիպումը Քի Վեսթում կտեւի 4 օր: Նա նշում էր, որ Քի Վեսթի հանդիպումը կդառնա Հայաստանի եւ Ադրբեջանի նախագահների ուղիղ երկխոսության, ինչպես նաեւ «Ֆրանսիայի նախագահ Ժակ Շիրակի մասնակցությամբ նրանց կողմից կատարված աշխատանքի» շարունակությունը:
Նույն օրը, Երեւանում հանդիպելով Տնտեսագիտական համալսարանի ուսանողների հետ, Հայաստանի նախագահ Ռոբերտ Քոչարյանն ասել էր, որ Ադրբեջանի նախագահի հետ «դեմ առ դեմ» ձեւաչափում իր հանդիպումների «ռեսուրսը գրեթե սպառվել է»: Ռոբերտ Քոչարյանը «կարեւոր» էր անվանել Հեյդար Ալիեւի հետ ապրիլի 3-ին Ֆլորիդայում կայանալիք հանդիպումը: Նրա խոսքերով, կողմերն արդեն պարզել էին վիճահարույց հարցերի շուրջ միմյանց դիրքորոշումները, եւ այժմ բանակցությունները շարունակելու «հերթափոխը» պետք է ընդունեն ԵԱՀԿ Մինսկի խմբի համանախագահները:
Հայաստանի նախագահը հայտարարել էր, որ Ֆլորիդայում Հեյդար Ալիեւի հետ հանդիպման ժամանակ նա պնդելու է ղարաբաղյան կարգավորման 3 հիմնական սկզբունքների պահպանման անհրաժեշտությունը. 1. ղարաբաղյան հակամարտության կողմերի իրավահավասարություն, 2. Լեռնային Ղարաբաղի անկլավային գոյության բացառում, 3. Լեռնային Ղարաբաղի բնակչության անվտանգության միջազգային երաշխիքներ:
Մարտի 29-ին ԱՄՆ Պետդերպարտամենտի պաշտոնական ներկայացուցիչ Ռիչարդ Բաուչերը նշեց, որ Միացյալ Նահանգները Ռուսաստանի եւ Ֆրանսիայի հետ միասին վերջին տարիներին ինտենսիվ աշխատում են ղարաբաղյան խնդրի կարգավորման համար:
«Նախագահները հանդիպել են Ժակ Շիրակին Փարիզում: Բանակցություններում առաջընթաց ապահովելու նպատակով մենք շատ սերտորեն աշխատել ենք Ռուսաստանի եւ Ֆրանսիայի հետ: Տվյալ փուլում նախագահները պետք է նստեն դեմ առ դեմ եւ քննարկեն կարգավորման հասնելու ուղիները, ինչը եւ մենք պատրաստվում ենք անել Քի Վեսթում», - ասում էր Բաուչերը:
Ապրիլի 2-ին, բանակցությունների մեկնարկի նախօրեին, Վաշինգթոնում անցկացված հատուկ ճեպազրույցում հանդես եկավ «Պետդեպարտամենտի բարձրաստիճան ներկայացուցիչը», որի անունը չհրապարակվեց: Հավանաբար, դա հենց ԵԱՀԿ Մինսկի խմբի ամերիկյան համանախագահ Քերի Քավանոն էր:
Դիվանագետը նշեց, որ Քի Վեսթում կայանալիք հանդիպումը խիստ տարբերվելու է ինչպես Հայաստանի եւ Ադրբեջանի նախագահների նախորդ ուղիղ հանդիպումներից, այնպես էլ Ֆրանսիայի նախագահի մասնակցությամբ կայացած նրանց բանակցություններից: Նա հայտարարեց, որ Ֆլորիդայում Մինսկի խմբի համանախագահները երկարատեւ բանակցություններ են վարելու ինչպես երկու նախագահների հետ միասին, այնպես էլ յուրաքանչյուրի հետ առանձին:
Պատասխանելով հարցին, թե արդյոք բանակցությունների ընթացքում հստակ բաժանում է դրվում Լեռնային Ղարաբաղի եւ Ադրբեջանի 6 տարածքների միջեւ, դիվանագետը հայտարարեց. «մենք աշխատում ենք ղարաբաղյան խնդրի համապարփակ լուծման ուղղությամբ»: Միեւնույն ժամանակ, ասաց նա, առաջնային են համարվում տարածքային հարցերը, քանի որ «Ադրբեջանի տարածքի զգալի մասն այսօր գտնվում է Հայաստանի ձեռքերում»: Ամերիկյան դիվանագետը նաեւ ասաց, որ սկզբունքային բնույթ են կրում «Լեռնային Ղարաբաղի ապագա քաղաքական կարգավիճակի» եւ փախստականների վերադարձի հարցերը:
Դիվանագետը նաեւ նշել էր, որ Ֆլորիդայում Հայաստանի եւ Ադրբեջանի նախագահների հանդիպման ընթացքում զգալի առաջընթացի դեպքում, ԵԱՀԿ Մինսկի խմբի համանախագահները պատրաստ են նոր խորհրդակցություններ սկսել միջազգային ֆինանսական ինստիտուտների հետ` տարածաշրջանի տնտեսական վերականգման հարցերով հատուկ առաքելություն ստեղծելու վերաբերյալ: Նա հիշեցրեց, որ 2000 թվականի մայիսին միջնորդների նախաձեռնությամբ Ժնեում հանդիպում կայացավ միջազգային ֆինանսական ինստիտուտների ներկայացուցիչների մասնակցությամբ, որի ժամանակ քննարկվում էին նման առաքելության ստեղծման հնարավորությունները:
Ամերիկացի դիվանագետը նաեւ ասաց, որ ԵԱՀԿ Մինսկի խմբի եռակի համանախագահությունը, չնայած սկզբնական մտավախություններին, բավականին ադրյունավետ ստացվեց: «Մերձավոր Արեւելքի, Հյուսիսային Իռլանդիայի եւ Կիպրոսի օրինակների վրա մենք գիտենք, թե որքան դժվար է բանակցություններում առաջընթացի հասնելը: Սակայն Լեռնային Ղարաբաղի դեպքում, աշխատելով Ռուսաստանի եւ Ֆրանսիայի հետ համատեղ, մենք տեսնում ենք առաջ շարժվելու հնարավորությունը», - ասում էր ամերիկացի դիվանագետը:
