Երեւան: Մեդիամաքս: Արցախի նախագահ Արայիկ Հարությունյանն այսօր կառավարության անդամներին ու պետնախարարի աշխատակազմին է ներկայացրել նորանշանակ պետական նախարար Ռուբեն Վարդանյանին:
Արայիկ Հարությունյանն ասել է, որ Ռուբեն Վարդանյանի փորձը, հնարավորությունները, արժեքավոր կապերն ամբողջ աշխարհի հետ այս փուլում անհրաժեշտ են Արցախին, հայտնում են Արցախի նախագահի աշխատակազմից:
«Ամենակարեւորը՝ նա հավատում է Արցախի ապագային: Նա համոզված է, որ Արցախում այժմ որոշվում է ողջ հայ ժողովրդի ապագան, եւ իր քայլով հաստատեց, որ իր համար ավելի կարեւոր բան չկա, քան Արցախ գալն ու այստեղ մեզ հետ գտնվելը, մեր ճակատագիրը մեզ հետ կիսելը: Նա մեզ հետ է, եւ այդպիսի մարդկանց պետք է առավելագույնս աջակցել՝ Հայրենիքին ծառայելու հարցում»,- ասել է Արայիկ Հարությունյանը:
Նա նոր պետնախարարին վստահեցրել է, որ ունենալու է իր, կառավարության, խորհրդարանի եւ Արցախի ժողովրդի աջակցությունը:
Ռուբեն Վարդանյանն իր հերթին ընդգծել է, որ իր համար մեծ պատիվ ու շատ ավելի մեծ պատասխանատվություն է այս պահին ստանձնել Արցախի պետական նախարարի պաշտոնը:
«Այդ որոշումը կայացրել եմ՝ գիտակցելով ստեղծված իրավիճակի ողջ լրջությունը: Մենք պետք է հասկանանք, որ հիմա մեզ համար հայրենական պատերազմ է, ճգնաժամային իրավիճակ, որը բոլորիցս պահանջելու է ուժերի, ջանքերի ներդրում, որպեսզի Արցախն ունենա իր անվտանգությունը, սուբյեկտայնությունն ու զարգացումը: Եթե մենք դա չգիտակցենք եւ չանենք ամեն ինչ այս նպատակին հասնելու համար, կնշանակի, որ մեր պարտքը չենք կատարում մեր ժողովրդի առջեւ: Մենք Արցախը ստացել ենք մեր նախնիներից եւ պարտավոր ենք այն փոխանցել հայության հաջորդ սերունդներին»,- ասել է Ռուբեն Վարդանյանը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: