Երեւան: Մեդիամաքս: Հայաստանի եւ Ռուսաստանի վարչապետներ Տիգրան Սարգսյանը եւ Դմիտրի Մեդվեդեւը վստահություն են հայտնել, որ հայ-ռուսական առեւտրաշրջանառության ծավալները նոր թափ կստանան Հայաստանի՝ Մաքսային միությանը եւ Միասնական տնտեսական տարածքին միանալուց հետո:
Ինչպես հաղորդում է Մեդիամաքս-ը, այսօր Սոչիում կայացած հանդիպման ժամանակ Տիգրան Սարգսյանը եւ Դմիտրի Մեդվեդեւը բարձր են գնահատել նաեւ Հայաստանի կողմից ՄՄ-ին անդամակցության «ճանապարհային քարտեզով» նախատեսված միջոցառումների իրականացման գործընթացը:
ՌԴ վարչապետը նշել է, որ Եվրասիական ինտեգրացիոն գործընթացներին Հայաստանի մասնակցությունը նոր թափ կհաղորդի երկու երկրների միջեւ տնտեսական ոլորտում փոխգործակցության զարգացմանն ու ամրապնդմանը:
Տիգրան Սարգսյանն իր հերթին նշել է, որ ռուսաստանյան ընկերությունները կարեւոր դեր են խաղում Հայաստանի տնտեսության մեջ:
«Հայաստանում գործում են ռուսաստանյան կապիտալով հազարից ավելի ընկերություններ: Ներդրումների ծավալով Ռուսաստանը մեր երկրում զբաղեցնում է առաջին տեղը: Հույս ունենք, որ առաջիկայում եւս այդ ներդրումները կշարունակվեն մեր երկրի տարբեր ոլորտներում»,- ասել է ՀՀ կառավարության ղեկավարը:
Տիգրան Սարգսյանը եւ Դմիտրի Մեդվեդեւը քննարկել են նաեւ ՀԱԷԿ-ի գործող էներգաբլոկի արդիականացման եւ շահագործման ժամկետի երկարաձգման աշխատանքներին վերաբերող հարցեր:
Փետրվարի 23-ին Տիգրան Սարգսյանը ներկա է գտնվել նաեւ ձմեռային օլիմպիական խաղերի փակման արարողությանը, որի շրջանակներում կարճատեւ զրույց է ունեցել նաեւ ՌԴ նախագահ Վլադիմիր Պուտինի հետ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: