Երեւան: Մեդիամաքս: ՌԴ Դաշնության Ժողովի Դաշնային Խորհրդի նախագահի տեղակալ Կոնստանտին Կոսաչովը մեկնաբանել է Ադրբեջանում Եվրոպական միության դեսպանի հայտարարությունը եւ կասկած հայտնել Ռուսաստանում դեսպանատների շենքերին ԵՄ դրոշերի անհրաժեշտության վերաբերյալ:
«Մինչեւ ե՞րբ Մոսկվայում եւ Ռուսաստանի այլ քաղաքներում, որտեղ գործում են Եվրամիության երկրների ներկայացուցչությունները, դեսպանատների եւ հյուպատոսությունների շենքերի վրա, ազգային դրոշերի հետ մեկտեղ պետք է կախված կլինի ԵՄ դրոշը՝ Ռուսաստանի համար, ընդհանուր առմամբ, թշնամական կազմակերպության: Գուցե բավարար է, որ այն կախված լինի միայն Ռուսաստանում նրա ներկայացուցչության շենքի վրա», - հայտարարել է Կոսաչյովը:
Որպես Ռուսաստանի նկատմամբ Եվրամիության թշնամական դիրքորոշման օրինակ Կոսաչովը բերել է Ադրբեջանում ԵՄ ներկայացուցչության ղեկավար Պետեր Միխալկոյի հայտարարությունը.
«Եվրամիության սադրիչը անպատկառ կերպով միջամտում է ԵՄ-ի անդամ չհանդիսացող երկու պետության հարաբերություններին»:
Հունիսի 30-ին Ադրբեջանում Եվրոպական միության ներկայացուցչության ղեկավար Պետեր Միխալկոն հայտարարել էր.
«Խորապես մտահոգված եմ Ռուսաստանում ադրբեջանցիների նկատմամբ բռնության, խոշտանգումների եւ անմարդկային վերաբերմունքի մասին հաղորդագրություններով»:
