Երեւան։ Մեդիամաքս։ The Financial Times-ը գրում է, որ Հայաստանի վարչապետ Նիկոլ Փաշինյանը եւ Ադրբեջանի նախագահ Իլհամ Ալիեւը առաջիկա կիրակի օրը կհանդիպեն Բրյուսելում՝ Եվրոպական Խորհրդի նախագահ Շառլ Միշելի միջնորդությամբ:
Պարբերականը նշում է, որ այս տեղեկատվությունը հաստատել են երեք լավատեղյակ աղբյուրներ: Նրանցից մեկը նշել է, որ Բրյուսելի հանդիպումը «առաջընթացի կարեւոր նշան կլինի»՝ ավելացնելով, որ ԵՄ եւ ԱՄՆ միջնորդական ջանքերը փոխլրացնում են միմյանց:
The Financial Times-ը գրում է, որ հունիսի 1-ին Քիշնեում կայանալիք Եվրոպական Քաղաքական Համայնքի գագաթնաժողովի շրջանակում Փաշինյանը, Ալիեւը եւ Միշելը կարող են հանդիպել Գերմանիայի կանցլեր Օլաֆ Շոլցի եւ Ֆրանսիայի նախագահ Էմանյուէլ Մակրոնի հետ:
Ադրբեջանի նախագահի խորհրդական Հիքմեթ Հաջիեւը The Financial Times-ին ասել է, որ իր երկիրը դրական է վերաբերվում է Շառլ Միշելի միջնորդությանը, «քանի որ ԵՄ-ն թաքնված օրակարգ չունի»: Նա ավելացրել է, որ ԵՄ նախաձեռնած գործընթացի շնորհիվ հնարավոր է եղել մշակել «առանցքային հայեցակարգեր» բանակցությունների եւ դրանք կառուցվածքի համար:
Հաջիեւը նշել է, որ Բաքուն ճկուն է Մոսկվայում, Վաշինգթոնում կամ Բրյուսելում հանդիպումներ անցկացնելու հարցում, քանի որ, նրա խոսքով, արդյունքի հասնելու համար գործընթացը պետք է հնարավորինս «ներառական» լինի:
«Ռուսաստանը կարող է արդյունավետորեն մասնակցել տարածաշրջանում խաղաղության կառուցմանը: Միեւնույն ժամանակ, հստակ է, որ Ռուսաստանը շատ զբաղված է Ուկրաինայի պատերազմով», - ասել է Հիքմեթ Հաջիեւը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: