Երեւան։ Մեդիամաքս։ Ադրբեջանի ԱԳՆ խոսնակ Այhան Հաջիզադեն այսօր ասել է, որ Երեւանը շահագրգռված չէ Բաքվի հետ հարաբերությունների կարգավորմամբ։
«Հայաստանը շահագրգռված չէ խաղաղության պայմանագրի ստորագրմամբ, քանի որ դեմ է Ադրբեջանի նկատմամբ տարածքային պահանջները բացառող կետերին, ոչ կառուցողական մոտեցում է ցուցաբերում` առաջ քաշելով «միջազգային մեխանիզմների» եւ «երաշխիքների միջազգային ինստիտուտի» մասին գաղափարներ։
Այն փաստը, որ հայկական կողմը, որը հրաժարվել էր խաղաղ պայմանագրի շուրջ բանակցություններից անցած դեկտեմբերին, տարբեր պատրվակներով հակադրվում է ԵՄ միջնորդական ջանքերին, վկայում է, որ նա մտադիր է շարունակել բանակցությունները խոչընդոտելու պրակտիկան, որը իրականացնում էր շուրջ 30 տարի», - ասել է Այհան Հաջիզադեն՝ մեկնաբանելով Հայաստանի վարչապետ Նիկոլ Փաշինյանի երեկվա հայտարարությունները։
Նա ասել է, որ իր հայտարարություններով Փաշինյանը «հարված է հասցրել խաղաղ գործընթացին» եւ «որը ամենակոպիտ կերպով խեղաթյուրում է պատմական փաստերը»։
«Հակաադրբեջանական արշավը, որը Փաշինյանը վարում է՝ խուսափելով տարբեր միջազգային հարթակներում իր ստանձնած պարտավորություններից եւ սեփական խոստումներից, նրա հռետորաբանությունը, որը զրոյացնում է խաղաղության պայմանագրի բանակցությունները եւ միջազգային միջնորդների ջանքերը, Հայաստանի համար լավ բան չեն խոստանում»,- ասել է Հաջիզադեն։
Նրա խոսքով, «Փաշինյանի կողմից ներկայիս Հայաստանի տարածքից ադրբեջանցիներին բռնի տեղահանելու փաստի ժխտումը վկայում է տասնամյակներ շարունակ Հայաստանի կողմից իրականացվող էթնիկ զտումների համակարգված եւ նպատակաուղղված քաղաքականությունը արդարացնելու մտադրության մասին»։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: