Փաշինյանի եւ Բլինքենի զրույցը՝ Երեւանի եւ Վաշինգտոնի մատուցմամբ - Mediamax.am

4056 դիտում

Փաշինյանի եւ Բլինքենի զրույցը՝ Երեւանի եւ Վաշինգտոնի մատուցմամբ


Լուսանկարը` REUTERS


Երեւան: Մեդիամաքս: Հայաստանի վարչապետ Նիկոլ Փաշինյանը մարտի 14-ին հեռախոսազրույց է ունեցել ԱՄՆ պետքարտուղար Էնթոնի Բլինքենի հետ:

Զրույցի մասին հաղորդագրություններ են տարածել ՀՀ կառավարության եւ ԱՄՆ Պետքարտուղարության մամուլի ծառայությունները, որոնք ներկայացնում ենք ձեր ուշադրությանը:

 

ՀՀ կառավարության մամուլի ծառայություն.

 

«Զրուցակիցներն անդրադարձել են հայ-ամերիկյան հարաբերությունների օրակարգային հարցերին եւ կարեւորել ռազմավարական երկխոսության շարունակականության ապահովումը՝ տարբեր ոլորտներում երկկողմ փոխգործակցության զարգացման ու ամրապնդման նպատակով: Վարչապետը շնորհակալություն է հայտնել ամերիկյան կողմին՝ ժողովրդավարական բարեփոխումների ուղղությամբ Հայաստանին հետեւողական աջակցություն ցուցաբերելու համար  եւ ընդգծել, որ ժողովրդավարության հետագա ամրապնդումը ՀՀ կառավարության բացարձակ առաջնահերթությունն է եւ մեր երկիրը հաստատակամորեն շարունակելու է շարժվել այդ ուղղությամբ:   

 

Նիկոլ Փաշինյանը եւ Էնթոնի Բլինքենն անդրադարձել են Հարավային Կովկասում տեղի ունեցող գործընթացներին, Լեռնային Ղարաբաղի շուրջ իրավիճակին եւ լարվածության աճին:

 

Կողմերը կարեւորել են տարածաշրջանում կայունության եւ խաղաղության ապահովումը՝ ընդգծելով ԵԱՀԿ Մինսկի խմբի համանախագահության շրջանակում Լեռնային Ղարաբաղի հիմնախնդրի համապարփակ կարգավորման անհրաժեշտությունը, ինչը կնպաստի Հայաստանի եւ Ադրբեջանի միջեւ խաղաղության հաստատմանը:  

 

ՀՀ վարչապետը եւ ԱՄՆ պետքարտուղարը մտքեր են փոխանակել Հայաստանի եւ Ադրբեջանի միջեւ սահմանագծման եւ սահմանազատման, տարածաշրջանում կոմունիկացիաների ապաշրջափակման հնարավորությունների, ինչպես նաեւ Հայաստանի եւ Թուրքիայի միջեւ ընթացող երկխոսության շուրջ:  

 

Անդրադարձ է կատարվել նաեւ միջազգային ասպարեզում տեղի ունեցող գործընթացներին, այդ թվում՝ Ուկրաինայում ստեղծված իրավիճակին»:

 

ԱՄՆ Պետքարտուղարության մամուլի ծառայություն.

 

«Պետքարտուղար Էնթոնի Բլինքենն այսօր զրուցել է ՀՀ վարչապետ Նիկոլ Փաշինյանի հետ։ Պետքարտուղարն ընդգծել է ԱՄՆ-Հայաստան երկկողմ գործընկերության շարունակական կարեւորությունը եւ ԱՄՆ հանձնառությունը՝ աջակցել Հարավային Կովկասի խաղաղ, ժողովրդավարական եւ բարգավաճ ապագային: Նշելով հայկական եւ ադրբեջանական ուժերի միջեւ սրման մասին վերջին հաղորդագրությունները՝ պետքարտուղարը կողմերին կոչ է արել զսպվածություն ցուցաբերել եւ ակտիվացնել դիվանագիտական ներգրավվածությունը՝ բոլոր առկա խնդիրների համապարփակ լուծումներ գտնելու համար:

 

Պետքարտուղարը հորդորել է շարունակել ժողովրդավարական բարեփոխումները Հայաստանում։ Պետքարտուղարն ընդգծել է ԱՄՆ-ի հանձնառությունը, այլ գործընկերների հետ միասին, շարունակելու Մոսկվային եւ նրա կողմնակիցներին, այդ թվում՝ Բելառուսում Լուկաշենկոյի ռեժիմին, պատասխանատվության կանչել Ուկրաինայի դեմ Կրեմլի չհրահրված եւ չարդարացված պատերազմի համար»։

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին