Թուրքիայի նախագահ Ռեջեփ Թայիփ Էրդողանը ԱՄՆ նախագահ Ջո Բայդենին կոչ է արել «անհապաղ վերանայել» հայտարարությունն այն մասին, որ 1915 թվականի հայերի զանգվածային սպանությունները ցեղասպանություն էին։

Reuters-ը նշում է, որ «Բայդենի պատմական հայտարարությունը կատաղեցրեց ՆԱՏՕ-ի դաշնակից Թուրքիային, որը հայտարարեց, որ այն «խորը վերք» է բացել երկկողմ հարաբերություններում, որոնք առանց այն էլ սրված էին մի շարք հարցերի պատճառով»։

Էրդողանն ասել է, որ «սխալ քայլը» խանգարելու է հարաբերություններին, ԱՄՆ-ին խորհուրդ է տվել «հայելու մեջ նայել» եւ ավելացրել է, որ Թուրքիան ձգտում է «բարիդրացիական հարաբերություններ» հաստատել Հայաստանի հետ։

«Եթե դուք ասում եք՝ «ցեղասպանություն», ապա պետք է հայելու մեջ նայեք եւ գնահատական տաք։ Կարիք չկա հիշատակելու այն մասին, թե ինչ պատահեց Ամերիկայի բնիկ ժողովուրդների հետ», - ասել է Էրդողանը։

Թուրքիայի նախագահը նաեւ վիճարկել է 1915 թվականին զոհվածների թիվը՝ ասելով, որ իրականում սպանվել է 150 000 մարդ, սակայն թիվը ուռճացվել է՝ «վերջում ավելորդ զրո ավելացնելով»։