Երեւան: Մեդիամաքս: ՀՀ կրթության եւ գիտության նախարար Լեւոն Մկրտչյանն այսօր ասել է, որ Հայաստանն ակնկալում է Եվրոպական միության աջակցությունը ՀՀ կրթական բարեփոխումներում:
Այս մասին նախարարն ասել է Եվրոպական հանձնաժողովի հարեւանության եւ ընդլայնման բանակցությունների գլխավոր տնօրինության հարեւանության հարցերով տնօրեն Լոուրենս Մերեդիթի գլխավորած պատվիրակության հետ հանդիպմանը:
Լեւոն Մկրտչյանը տեղեկացրել է, որ լայնածավալ բարեփոխումներ են նախատեսվում բուհական համակարգում՝ ֆինանսավորման մեխանիզմների եւ բուհերի հավատարմագրման գործընթացների հետ կապված: Նախարարի խոսքով՝ մշակման փուլում է գտնվում Տավուշի մարզի ծրագիրը՝ հաշվի առնելով այդ մարզի կրթական առանձնահատկությունները: Ծրագրի արդյունավետ լինելու պարագայում՝ այն կկիրառվի նաեւ այլ մարզերում:
Լոուրենս Մերեդիթն էլ նշել է, որ կարեւորում է ԵՄ-Հայաստան համագործակցությունը, եւ ՀՀ կառավարության աջակցությամբ մտադրություն կա կրթության եւ գիտության ոլորտը բարելավելու նպատակով կիրառել Taiex եւ Twinning գործիքները:
ԵՄ ներկայացուցիչը ողջունել է նաեւ e-learning համակարգի փորձնական ծրագրի ներդրումը Հայաստանում եւ պատրաստակամություն հայտնել համագործակցել միջազգային այլ կազմակերպությունների հետ՝ կրթության ոլորտը զարգացնելու նպատակով:
Նշվել է նաեւ, որ մտադրություն կա Հայաստանի տարբեր մարզերում ընդլայնել «Թումո»-ի ցանցը եւ ԵՄ աջակցությամբ հնարավորություն ստեղծել ստարտափների եւ նոր ծրագրերի իրականացման համար:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: