Երեւան: Մեդիամաքս: ՀՀ վարչապետ Նիկոլ Փաշինյանն այսօր ասել է, որ «ամենակարեւոր գործերից մեկը, որ պետք է իրականացնի Հատուկ քննչական ծառայությունը, մարտի 1-ի ոճրագործության, սպանությունների բացահայտումն է»:
Այս մասին վարչապետը նշել է ՀՔԾ նորանշանակ պետ Սասուն Խաչատրյանին ներկայացնելիս:
«Ուզում եմ հստակ ասել, երբ մենք ասում ենք, որ չկան եւ գոյություն չունեն սահմանափակումներ՝ նկատի ունենք, որ չկան եւ գոյություն չունեն սահմանափակումներ: Եթե նախկինում եղել են այնպիսի գործեր, որոնք ինչ-ինչ՝ քաղաքական, մերձքաղաքական կամ այլ օբյեկտիվ ու սուբյեկտիվ պատճառներով չեն գնացել առաջ, հույս ունեմ, որ ՀՔԾ նոր պետի ղեկավարությամբ քննիչները կանդրադառնան բոլոր այդ գործերին՝ Հայաստանում լիարժեք իրավակարգ ապահովելու նպատակներից ելնելով»,- ասել է վարչապետը:
Կառավարության ղեկավարն անդրադարձել է նաեւ ՀՔԾ քննիչների աշխատասենյակներում ՀՀ պաշտոնյաների լուսանկարներ փակցնելու խնդրին:
«Կարծում եմ, որ ՀՔԾ քննիչների աշխատասենյակներում ՀՀ որեւէ բարձրաստիճան պաշտոնյայի լուսանկար պետք է չլինի, որովհետեւ ՀՔԾ-ն զբաղվում է այնպիսի գործերով, որոնցով կարող է առնչություն ունենալ նաեւ այդպիսի պաշտոնյաների հետ»,- ասել է Նիկոլ Փաշինյանը:
Սասուն Խաչատրյանն էլ համոզմունք է հայտնել, որ ՀՔԾ կոլեկտիվը կարող է լուծել ցանկացած բարդության խնդիր:
«Դրա համար ունենք կամք: Վստահեցնում եմ, որ պատվով կկատարենք ՀՔԾ-ի առջեւ դրված բոլոր խնդիրները»,- ասել է ծառայության նորանշանակ պետը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: