Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:

Այդ բացը լրացնելու ցանկությամբ Մեդիամաքսը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:

•    15 ՏԱՐԻ ԱՌԱՋ. 2003 ԹՎԱԿԱՆԻ ՀՈՒՆՎԱՐԻ 22-28

«Ժառանգության» ծնունդը

Ռազմավարական եւ ազգային հետազոտությունների հայկական կենտրոնի ղեկավար Րաֆֆի Հովհաննիսյանը հունվարի 28-ին ազդարարեց «Ժառանգություն» քաղաքական կուսակցության ստեղծման մասին:

Րաֆֆի Հովհաննիսյանը 2003 թվականին

Լուսանկարը` Ֆոտոլուր

Րաֆֆի Հովհաննիսյանը հայտարարել էր, որ «Ժառանգությունը» կդառնա «որակապես նոր քաղաքական ուժ, որը հանձնառու է վերականգնել մարդկանց հավատը սեփական ուժերի նկատմամբ»:

•    10 ՏԱՐԻ ԱՌԱՋ. 2008 ԹՎԱԿԱՆԻ ՀՈՒՆՎԱՐԻ 22-28

«Փրկության ճանապարհ» եւ «անխուսափելի կործանումը»

Հունվարի 28-ին ՀՀ նախկին նախագահ, ՀՀ նախագահի թեկնածու Լեւոն Տեր-Պետրոսյանի մամուլի ծառայությունը տարածել էր նրա ուղերձը, որում ասված էր, որ «փետրվարի 19-ին ընտրությունը կայանալու է ոչ թե անհատների, այլ երկրի զարգացման երկու հնարավոր ճանապարհների միջեւ, որոնցից մեկը անխուսափելի կործանման, մյուսը՝ փրկության ճանապարհն է»:

Լեւոն Տեր-Պետրոսյանը

Լուսանկարը` Ֆոտոլուր

«Սերժ Սարգսյանի ընտրության պարագայում մեր երկրում որեւէ դրական տեղաշարժ չի լինելու, այլ ընդհակառակը, ավելի են ծավալվելու այն բոլոր արատավոր երեւույթները, որոնք առկա էին Ռոբերտ Քոչարյանի նախագահության օրոք», - ասել էր երկրի նախկին ղեկավարը:

•    5 ՏԱՐԻ ԱՌԱՋ. 2013 ԹՎԱԿԱՆԻ ՀՈՒՆՎԱՐԻ 22-28

Վրաստանի հայկական եկեղեցիները

Հունվարի 24-ին Թբիլիսիում կայացավ է հայ-վրացական հանձնաժողովի առաջին աշխատանքային նիստը, որը պետք է ուսումնասիրեր Վրաստանի տարածքում գտնվող Սուրբ Նշան, Սուրբ Գեւորգ, Նորաշեն, Սուրբ Մինաս եւ Կարմիր Ավետարան հայկական եկեղեցիների հարցը:

Թբիլիսիի Նորաշեն Սուրբ Աստվածածին հայկական եկեղեցին

Լուսանկարը` Yuki Sakamoto

Համատեղ հանձնաժողով ստեղծելու մասին որոշումը կայացվել էր Վրաստանի վարչապետ Բիձինա Իվանիշվիլիի` Երեւան կատարած այցի ժամանակ: 

Հանձնաժողովի կազմում ընդգրկվել էին Վրաստանի մշակույթի նախարարության, Վրաց ուղղափառ եկեղեցու, Հայ Առաքելական եկեղեցու, ոչ պետական կազմակերպությունների ներկայացուցիչները:

Հանձնաժողովի անդամներից մեկը` «21-րդ դար» կազմակերպության նախագահ Պաատա Գաչեչիլաձեն ասում էր, որ «եկեղեցիների պատկանելության հարց չկա, խոսքը վերաբերում է դրանց պահպանմանը»:

Արա Թադեւոսյան