Մենք ապրում ենք հասարակությունում, որի շատ անդամներ այլեւս իրենց կյանքն առանց Ֆեյսբուքի ու այնտեղ իրենց կարծիքը հայտնելու չի պատկերացնում: Միգուցե, դա ունի որոշակի առավելություններ: Իսկ թերությունն է այն, որ այս կամ այն բուռն քննարկման մասնակիցները չեն հիշում, կամ էլ ընդհանրապես չգիտեն, թե ինչ է եղել Հայաստանում, օրինակ, 5, 10 կամ 15 տարի առաջ:
Այդ բացը լրացնելու ցանկությամբ Մեդիամաքսը վարում է 5/10/15 խորագիրը, որն ամեն շաբաթ ներկայացնում է իրադարձությունները, որոնք տեղի էին ունենում Հայաստանում 5, 10 եւ 15 տարի առաջ:
• 15 ՏԱՐԻ ԱՌԱՋ. 2002 ԹՎԱԿԱՆԻ ՀՈԿՏԵՄԲԵՐԻ 23-29
Հրավեր՝ Ռուսաստանին
Հոկտեմբերի 25-ին ՀՀ պաշտպանության նախարար Սերժ Սարգսյանն ասել էր, որ ՆԱՏՕ-ի «Գործընկերություն հանուն խաղաղության» ծրագրի շրջանակներում 2003 թվականին Հայաստանում կայանալիք Cooperative Best Effort զորավարժությունների անցկացումը չպետք է անհանգստացնի Ռուսաստանին:
Լուսանկարը` Ֆոտոլուր
«Ռուս զինծառայողները կարող են անմիջական մասնակցություն ունենալ այդ զորավարժություններում: Ամեն դեպքում՝ մենք անպայման հրավեր կուղղենք Ռուսաստանի ռազմական ղեկավարությանը», - նշում էր Սերժ Սարգսյանը:
• 10 ՏԱՐԻ ԱՌԱՋ. 2007 ԹՎԱԿԱՆԻ ՀՈԿՏԵՄԲԵՐԻ 23-29
Տեր-Պետրոսյանի վերադարձը
Հոկտեմբերի 26-ին ՀՀ առաջին նախագահ, 62-ամյա Լեւոն Տեր-Պետրոսյանը հայտարարել էր, որ կմասնակցի 2008 թվականի նախագահական ընտրություններին:
Լուսանկարը` Ֆոտոլուր
Ելույթ ունենալով Ազատության հրապարակում անցկացվող հանրահավաքի ժամանակ, Լեւոն Տեր-Պետրոսյանը հանդես էր գործող իշխանությունների սուր քննադատությամբ, ովքեր, նրա խոսքով, «Հայաստանը վերածել են վտարանդի պետության, երրորդ աշխարհի երկրի»:
• 5 ՏԱՐԻ ԱՌԱՋ. 2012 ԹՎԱԿԱՆԻ ՀՈԿՏԵՄԲԵՐԻ 23-29
Ասոցացման օրակարգը
Հոկտեմբերի 26-ին Բրյուսելում կայացել էր Ասոցացման համաձայնագրի ստորագրման շուրջ Հայաստան-ԵՄ բանակցությունների հերթական փուլը, որի ընթացքում կողմերը պայմանավորվածություն էին ձեռք բերել աշխատանքներ տանել Ասոցացման օրակարգ ձեւավորելու ուղղությամբ:
Լուսանկարը` Ֆոտոլուր
Կողմերն արձանագրել էին, որ համաձայնեցված է ապագա համաձայնագրի նպատակների եւ ընդհանուր սկզբունքների, ինչպես նաեւ քաղաքական երկխոսության, արտաքին եւ անվտանգության քաղաքականության ու արդարադատության ոլորտներում համագործակցությանն առնչվող հարցերի հիմնական մասը:
Արա Թադեւոսյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: